Den un sentencia pronuncia riba 12 di december 2025, e Hoge Raad di Hulanda a rechasa e apelacion den casacion presenta pa Jairo Alejandro Ortega Carvajal contra Management (GAZM) y otro companianan relaciona. Cu e decision aki, e instancia mas halto di husticia a pone punto final na un conflicto legal cu a dura mas cu ocho aña.
Fondo di e caso
E caso a surgi for di un acuerdo comercial entre Ortega Carvajal y un grupo di companianan local relaciona cu GAZM pa e desaroyo di un proyecto di construccion di un compleho di apartamento di 14 unidad na Aruba. Segun e expediente hudicial, e companianan local a cumpli cu e rekisitonan contractuel y a firma e documentonan necesario pa cuminsamento di e proyecto.
Ortega Carvajal, no a cumpli cu e resto di e obligacionnan financiero ni cu e palabracionnan establece den e contracto. Esaki a hiba na un disputa riba cual di e partidonan tabatin e derecho legal pa pidi ontbinding (anulacion) di e acuerdo.
Decision den instancianan anterior
Den prome instancia y posteriormente den apelacion, e Gemeenschappelijk Hof van Justitie a conclui cu Ortega Carvajal a faya den su obligacion principal di pago y cu, a base di esaki, e companianan local tabatin derecho pa pidi ontbinding di e acuerdo. Hof a determina cu desde october 2018 Ortega Carvajal no tabata cumpli cu e contrato.
Hof tambe a rechasa e demanda di Ortega pa un compensacion di aproximadamente 1,8 miyon florin, cu el a afirma cu tabata gasto di inversion den e proyecto. Segun e sentencia, no a wordo presenta suficiente prueba pa sostene e reclamo, y Hof a expresa duda riba e magnitud di e gastonan alega.
Adicionalmente, e Hof a ordena cu Ortega Carvajal mester paga e costo nan di abogado di e otro partidonan, estima na alrededor di 60.000 florin.
Sentencia di e Hoge Raad
Despues di e decision desfavorabel di e Hof riba 30 di juli 2024, Ortega Carvajal a presenta apelacion den casacion na e Hoge Raad. Sinembargo, Hoge Raad a determina cu e kehonan presenta no tabata suficiente pa anula e sentencia di e Hof.
E tribunal supremo a indica cu no tabata necesario duna un motivacion amplio, conforme articulo 81 di e Wet op de rechterlijke organisatie. Riba e base di esaki, Hoge Raad a dicidi:
• Rechasa e apelacion den casacion;
• Condena Ortega Carvajal den e costonan di e proceso di casacion.
E costonan a wordo fija na € 8.206 pa gastonan y € 2.200 pa salario di abogado, na fabor di GAZM c.s.
Consecuencia di e decision
Cu e desicion di e Hoge Raad, e apelacion a wordo definitivamente rechasa. Ortega Carvajal mester paga mas cu €10.000 na costonan di e proceso di casacion, ademas di e obligacionnan financiero cu ya tabata estableci den e sentencianan anterior.
E decision aki ta marca e fin di un largo proceso civil den corte cu a involucra multiple instancia di corte y cu a tin implicacionnan financiero significativo pa e partidonan envolvi.
Na e momento aki Alejandro Ortega Carvajal ta someti na un daño di perhuicio alrededor di 3 miyon florin cu e lo mester bay paga na e companianan cu e la haci daño.
Hoge Raad rechasa apelacion di casacion den caso contra GAZM Management V.B.A.
