E situacion actual na Aruba tocante Rijkswet HOFA no ta haya atencion solamente a nivel local, sino tambe internacionalmente. Segun representante sindicalnan, organizacionnan global ta sigui de cerca e desaroyo politico y institucional di e isla riba e desicion nan di gobierno di AVP-FUTURO no democratico cu ta tumando luga.
Public Services International (PSI), un federacion mundial cu ta representa trahadornan den sector publico, a pone su wowo riba Aruba. A traves di sindicato TOPA, cu ta representa PSI localmente, e organisacion ta expresa preocupacion riba loke nan ta considera decisionnan cu no ta completamente democratico.
Vilma Thijsen di TOPA a indica cu PSI ta sostene sindicatonan na Aruba den nan lucha pa proteha derecho di trahadonan y pa mantene transparencia den gobernacion. E manera con e Rijkswet HOFA ta wordo implementa y maneha, ta crea cuestionnan serio riba participacion democratico y autonomia di e pais.
E interes di un organisacion internacional manera PSI ta mustra cu e situacion na Aruba a trece atencion mas amplio, y cu e accionnan di sindicatonan local ta haya respaldo mas aya di frontera di e isla.