Gobierno di Aruba ta presenta un vision positivo y constructivo pa futuro di Reino
Den e reunionnan oficial cu presidente di Eerste Kamer, Mei Li Vos, y cu e Comision pa Relacionnan di Reino di Tweede Kamer, Gobierno di Aruba a comparti un vision cla y constructivo tocante futuro di Reino Hulandes. Prome Minister mr. Mike Eman, hunto cu Ministro Plenipotenciario mr. Mildred Schwengle y delegacion di Aruba, a enfatisa e importancia di construi un Reino cu ta funcional, relevante y cu ta crea balor agrega pa tur su paisnan.
Segun Prome Minister Mike Eman, hopi biaha e debate riba Reino ta concentra principalmente riba conflicto y diferencia di opinion, mientras cu falta atencion pa e pregunta fundamental: kico Reino kier ta den futuro? “Nos a bay cu un mensahe hopi cla. Aruba tin un vision positivo pa Reino. Nos kier un Reino cu ta funciona bon, cu ta crea oportunidadnan y cu tin balor agrega pa henter su pueblo,” Prome Minister Mike Eman a declara despues di e encuentro na Tweede Kamer. Durante e reunionnan, Gobierno di Aruba a presenta diferente ehempel concreto di con colaboracion den Reino por contribui na desaroyo economico, innovacion y fortalecemento di posicion strategico di Aruba den region di Caribe y Sur America y Centro America.
Un di e ehempelnan menciona tabata e cooperacion cu Wageningen University & Research, cu ta habri caminda pa establecimento di actividad academico y investigacion na Aruba. Segun Prome Minister Eman, e iniciativa aki no solamente ta yuda Aruba den area di sostenibilidad, agricultura y naturalesa, sino tambe ta crea oportunidadnan pa Hulanda den region. “Nos ta mustra cu institutonan y companianan Hulandes por hunga un rol importante den Caribe y region. Aruba por ta un plataforma strategico pa conocemento, innovacion y colaboracion internacional,” Eman a expresa.
Durante e dialogo cu miembronan di Tweede Kamer, tambe a papia riba diferente oportunidadnan economico y strategico, incluyendo e proceso di EU preclearance, cooperacion academico y e futuro desaroyo di e refineria. Gobierno di Aruba a enfatisa cu e enfoke nobo ta uno basa riba aliansa, colaboracion y comparti oportunidadnan, enbes di solamente enfoca riba conflicto. Prome Minister Eman a indica cu e reaccionnan durante e reunionnan tabata positivo y cu tin interes genuino den e vision cu Aruba ta presenta.“Nos ta nota cu tin interes pa un otro forma di mira Reino. No solamente mira unda tin problema, pero tambe mira unda tin oportunidadnan pa traha hunto y fortalece Reino pa tur hende,” Eman a comenta.
Gobierno di Aruba ta considera e bishita aki como un paso importante den fortalecemento di relacionnan institucional cu Hulanda y den crea un ambiente di mayor colaboracion dentro di Reino Hulandes.
Comunicado di Gobierno di AVP-FUTURO
