(Noel)
Lo mi kier a djis duna mi opinion riba e articulo aki cu mi a lesa publica pa dossierkoninkrijkrelaties dia 3 di juni 2026.
Prome cu mi continua mi kier pone na cla cu ami tin un amor grandi pa tur persona cu ta den e confusion di pensamento LGBTQ. Y e amor aki ta pone mi cu mi mester splica algun berdad cu ta necesario pa keda comparti, pa asina otorga un chens husto na tur cu kier scucha pa pensa y tuma nan propio decisionnan.
(Articulo)
Minister Van Weel kier ofrece proteccion igual na ciudadanonan di BES.
(Noel)
Igualdad pa ciudadanonan di BES.
Mi pregunta ta, ki ora si y ki ora no e ‘igualdad’ cu nos ta papia di dje aki ta keda aplica? Nos tur sa di e buki cu sra. Nina den Heyer y Rene Zwart, hoofdredacteur di dossierkoninkrijkrelaties, a fia y cu a keda publica na october 2025 (15 aña despues di 101010) titula Cronicanan di promesanan kibra, cual ta duna un bista cla di e desigualdad entre ciudadanonan Hulandes europeo y esnan di Hulanda Caribense.
(Articulo)
Un mayoria den Senado no ta na fabor pa exclui Hulanda Caribense for di e implementacion di e prohibicion legal pa obliga personanan homosexual y transgender pa haci terapia of sanacion di fe.
(Noel)
Prome, un mayoria di senado. Eerste Kamer ta consisti di 75 miembro. Kiermen un mayoria di e 75 hendenan aki, kisas 40 persona, ta tuma decisionnan pa nos aki na Boneiro. Y tene esaki den mente: den democracia mayoria ta dicidi, pero no necesariamente loke mayoria dicidi mester ta corecto. Pasobra si bo tin un senado cu su cabes ta lidera pa un persona cu ta practica actonan contra funcion natural di e curpa, bo no por spera tampoco cu e influencia cu esaki kier trese tambe ta funda riba e fuente corumpi aki.
Scuridad jamas por produci luz.
“obliga personanan homosexual y transgender pa haci terapia of sanacion di fe”
(Noel)
Mi pregunta ta, personanan di cua edad nan ta referi na dje precisamente? Pasobra segun mi, un mucha di 0 te cu 18 aña ta cai bou di guia y mester keda educa door di su mayornan. Nan tin cu dicidi con e ta keda educa y no estado.
Ora cu e mucha ey haci 18 aña, ningun hende no por oblig’e haci nada di loke e no kier haci. P’esey ta importante pa mayornan educa nan yunan den amor cu realidad y berdad den temor di Dios prome cu nan bira adulto, pa asina evita cu nan ta bay corre cree tur tipo di locura.
Kiermen bo no por obliga ningun hende, sea un homosexual of transgender adulto, pa comberti; e no ta bay. Bo por comberti solamente ora bo mes realise e erornan cu bo ta biba aden despues cu bo a wordo conscientisa cu e berdad. E persona ey tin cu tuma su propio decision. Pasobra bo por presiona un hende pa comberti, pero Dios no ta bay forsa e hende ey cambia si e hende ey no kier cambia.
Bo por ranca un hende for di su propio boluntad, hib’e misa y laga pastor resa p’e un aña mes pa sanacion of liberacion, pero si e persona ey su curason no ta habri pa esaki, Dios lo no por san’e. Pasobra esaki lo bay contra boluntat di e persona ey. Si, Dios ta amor, y djis pa motibo cu E ta amor E ta respeta cada ken su boluntad propio, te hasta ora cu Su curason ta haci dolor di mira un hende riba caminda di perdicion eterno. Dios jamas ta obliga ningun hende pa haci nada fuera di nan boluntad.
E tipo di leynan aki, na mi opinion, tin hopi mas di haber cu crea un impresion robes pa cu palabra di Dios y e intencion pa exclui educacion corecto y principionan biblico for di nos comunidad.
(Articulo)
Miembro di BBB Marquart Scholtz a mustra riba obheccionnan cu administracion insular di Boneiro y lidernan religioso riba e isla a expresa den cartanan pa Den Haag. “Tin diferencianan cla cultural y religioso entre Hulanda y e islanan”, asina e senador a bisa.
(Noel)
Claramente nos aki na Boneiro ta consciente cu nos a lanta educa cu principionan moral. Aunke cu kisas nan no ta keda practica manera mester ta pa hopi, pero ta logico pa nos comprende cu ora dos hende di mesun sexo kier envolve cu otro sexualmente, algo den nan mente ta den un estado di confusion y cu e relacionnan aki no por reproduci nada. Relacionnan homosexual ta destruccion di e plachi corecto di famia. Akseso aki na Boneiro na luna di december 2025 a saca un video masha bunita tocante famia como nucleo di nos comunidad.
Y nos mester reconoce esey. Pasobra acepta e confusion aki no ta cambia nada na e principionan y e berdad cu bo sexo ta keda determina na bo curpa biologico. Ningun ley of imaginacion no por cambia e principio aki.
Aun maske prome minister di Hulanda ta practica e perversidadnan aki.
(Articulo)
“Si puntonan di bista culturalmente diferente ta prevalece eynan, mi lo bisa: mas tanto motibo pa aplica e legislacion aki eynan tambe. Mi no ta mira ningun motibo pa bisa: laga nos no introduci esaki eynan. En realidad ta parse mi un bon idea pa haci esey,” Gala Veldhoeven (GroenLinks-PvdA) a contesta.
(Noel)
Djis scucha e tono cu e persona aki ta papia cun’e. Ken e persona aki ta? Con su estado moral ta? Cuanto tempo el a biba aki na Boneiro? Cuanto respet e ta duna nos como habitantenan aki? Ki derecho e tin pa obliga nos acepta algo cu nos no a dicidi nos mes aki riba dje? Nos ta comprende awor con e poder colonial ta funciona?
(Articulo)
Minister di Husticia y Seguridad David van Weel: “Di acuerdo cu e principio di ‘cumpli of splica’ (comply or explain), en principio tur cambio den legislacion ta conta tambe pa e islanan BES. Nos no a haña ningun motibo pa desvia di esaki den e caso aki. Nos ta considera di gran importancia cu personanan riba e islanan BES ta ricibi e mesun proteccion cu personanan na Hulanda.”
(Noel)
Cu otro palabra, e reino colonisador su senado (Eerste Kamer), cual ta consisti di 75 persona di cua mayoria cu kier implementa leynan riba nos aki ta personanan cu kisas nunca a bishita Boneiro (nos cas), y claramente nan no ta respeta tampoco nos norma- y balornan, esta cartanan di gobierno y lidernan spiritual riba e isla relaciona cu e asunto di LGBTQ aki, cual nan como senado ta bou di guia di un lider cu ta bibando un bida contra principionan normal di funcionamento humano como homber y muhe pa loke ta trata sexualidad.
Kier obliga nos implementando leynan pa evita nos di conscientisa cu e berdad, pero pa sostene ideologianan erroneo, sin obliga ningun hende pa comberti, pasobra atrobe: bo no por obliga hende comberti pasobra combersion ta un decision cu cada ken tin cu tuma personalmente pa nan mes despues di a yega na conocemento. Dios jamas ta obliga ningun hende haci nada fuera di e hende ey su boluntad propio.
Ta obligacion di mayornan pa percura pa educa nan yunan cu tur dos banda di e medaya. Pasobra permiti legislacionnan cu estado ta implementa, cu claramente ta destina pa obliga tur hende acepta ideologianan erroneo cu caba na scolnan ta keda imprimi den mente di e inocentenan aki, lo sigui daña mente di e inocentenan cu ta lanta aki. Ta importante pa trese e berdad tambe dilanti pa duna nan un chens husto pa scoge loke ta corecto.
(Articulo)
Scholtz: “E organo publico di Boneiro en berdad ta tresiendo argumentonan dilanti pa bisa, ‘Warda un rato cu e legislacion ey, pasobra nos no ta cla pa esey ainda.’ E lidernan di iglesia ta bisa esey tambe. Ta p’esey mi pregunta na e Minister ta pa warda cu entrada na vigor di e disposicion penal pa e islanan BES; nos mester evita cu e idea ta surgi riba e islanan ey cu un tipo di neocolonialismo ta pusha un ley nobo den nan garganta.”
(Noel)
Esnan aki na Boneiro cu no kier comprende of acepta cu nos ta bibando den un sistema colonial moderno—cual por mira claramente na e echonan con leynan ta keda traha sin consulta cu nos y aun maske nos duna nos punto di bista pa cu e leynan aki nan ta keda rechasa—ta totalmente ciego pa realidad.
(Articulo)
Minister Van Weel: “E implementacion di legislacion na islanan BES ta tuma luga via un fasedura di ‘cumpli of splica’. Loke nos ta haciendocu esaki ta cumpli. En principio, nos ta ofrece e mesun proteccion huridico na nos ciudadanonan na islanan BES cu na nos ciudadanonan na Hulanda. E hecho cu e practicanan aki por sodose eynan lo ta, pa mi, precisamente un motivacion pa drenta den e articulo di ley aki mesora, pa asina garantisa cu nos por encursa e proteccionnan ey mas lihe.”
(Noel)
Bonerianonan, a yega tempo pa nos habri nos wowonan. Biba fiesta so sin usa sinti ta trese esakinan: hendenan cu nos no sa mes ken nan ta, ta dicidi pa nos con nos tin cu educa nos yunan, y ta educa nan den un forma incorrecto y robes, cual consecuencia ta destruccion di nan mente, curpa y alma.
Laga nos cuminsa habri nos wowonan y cuminsa comprende realidad di bida.