Cada hende cu logra sali for di adiccion ta un victoria pa un famia, pa un comunidad y pa Aruba. Pero pa parlamentario Eduard Pieters, e berdadero pregunta ta otro: Pakico nos ta sigui permiti cu mas hende ta cay den e mesun circulo?
Durante e tratamento di e maneho riba adiccion y salud mental, lider di fraccion di PPA a lanta un critica contundente riba loke el a yama un falta di liderazgo structural di gobierno.
Segun Pieters, Aruba a yega na un punto, unda adiccion no por ta mira solamente como un problema individual. Ta un reto nacional, cu ta toca salud publico, siguridad, bienestar social y e futuro di hopi famia.
Husticia no por carga e problema su so
Pieters a enfatisa cu Aruba tin polis, profesional, varios organisacion y boluntario cu diariamente ta lucha pa yuda e personanan cu dependencia di alcohol, droga y otro tipo di adiccion.
Pero segun Pieters, e sistema actual ta inverti, aunke ta poco, hopi mas den reaccion cu den prevencion.
“Adiccion no ta un problema cu mester cuminsa den Ministerio di Husticia. Promer cu tur cos, ta un asunto di salud publico.”
Segun e parlamentario, e rol di husticia ta importante, pero no por substitui un maneho nacional lidera pa salud publico.
Silencio politico pa falta di liderazgo
Un di e puntonan cu mas ta preocupa Pieters, ta e falta di liderazgo politico riba e tema aki.
Segun Pieters, Aruba no por enfrenta un crisis creciente di salud mental y adiccion, mientras e minister responsabel ta keda practicamente afor di e discusion nacional.
“Un pais no por laga un problema di e magnitud aki solamente den man di polis, e fundacionnan y e profesionalnan. Ta Gobierno ta esun cu mester lidera.”
Pieters ta cuestiona e falta di un maneho intergral nacional, e coordinacion y structura entre e ministerionan y e vision di gobierno pa preveni cu mas ciudadano ta termina den dependencia di substancianan adictivo.
Ki dia ta cuminsa traha preventivo?
Segun Pieters, Aruba ta sigui reacciona ora e problema ya a explota. Es decir, ora un persona ya a yega den sistema di husticia, ora un famia ta kibra, of ora un adicto no por sigui funciona den sociedad. Pero e pregunta fundamental ta: kico gobierno ta haciendo prome cu e tragedia sosode? Pieters ta boga pa un maneho integral cu ta conecta salud, bienestar social, educacion, comunidad y husticia, cu inversion serio den prevencion, tratamento, rehabilitacion y reintegracion.
Goberna kiermen preveni y no djis reacciona ora ta laat
Pieters a conclui cu un gobierno responsabel no por limita su maneho na ataca e consecuencia di un crisis. “Un pais fuerte no ta midi su exito den cuanto hende e ta procesa of trata despues. E ta midi su exito den cuanto hende nunca mester yega riba e listanan ey.”
Pa fraccion di PPA, e lucha contra adiccion no ta solamente un debate tocante salud mental. Ta un refleho di liderazgo nacional.