Parlamentario Endy Croes a expresa su preocupacion despues di e reunion publico cu Minister Wendrick Cecilia, relaciona cu un contrato di 2.1 miyon florin cu Aruba Tourism Authority (ATA) a firma cu Ecotech pa e maneho di desperdicio.
Segun e parlamentario, e reunion aki no a brinda e claridad necesario. El a señala cu tin falta di transparencia den e documentacion presenta y a cuestiona e inconsistencianan den e declaracionnan duna pa tanto ATA como e Minister concerni. E parlamentario a enfatisa cu e tarea di Parlamento ta pa controla gobierno y brinda claridad. Pa e motibo aki, e no a keda satisfecho cu e resultado di e reunion y lo sigui profundisa riba e topico aki pa haya e contesta- y documentonan cu ainda falta.
16 miyon di ATA pa proyectonan di gobierno
Den presupuesto di ATA pa aña 2026, presenta na Parlamento dia 28 di januari 2026, ATA a aloca un “line item” nobo di 16 miyon florin riba peticion di Minister di Turismo y Conseho di Minister pa proyectonan di gobierno (Government Development), cual a keda categorisa bou di Total Marketing Expenses. Banda di esaki, a base di e resultadonan financiero di aña 2025, gobierno lo ricibi un minimo di 45 miyon florin for di ATA durante e transcurso di e aña aki.
E 16 miyon “sin destino” di ATA ya tabatin caminda di bay
Durante e reunion publico, Parlamentario Endy Croes a splica cu e presencia di e Directora di ATA y Minister Cicilia den sala di Parlamento dialuna y diamars ultimo, tabata un oportunidad ideal pa haya aclaracion inmediato riba e puntonan pendiente.
El a recorda cu dia 28 di januari ultimo, momento cu ATA a presenta su presupuesto pa aña 2026, Parlamento a tuma nota di e introduccion di e “line item” nobo di 16 miyon florin. Mesora a cuestiona ATA pa cual proyectonan di gobierno e fondonan aki ta destina. E contesta ricibi e dia ey tabata cu ATA no a ricibi informacion ainda riba e proyectonan, sino cu simplemente a reserva e suma extra aki pa gobierno.
Den e mesun cuadro, a cuestiona si tabatin criterio y regla fiho pa e uzo di e placa aki, riba cual ATA a splica cu e firma Ernst & Young tabata den proceso di stipula e criterionan ey. Siguiendo cu e liña di cuestionamento, dialuna ultimo, a puntra Minister Cicilia y ATA si e proyecto permanente di “Baki den Bario” lo cay bou di e fondo aki. E contesta tabata afirmativo, confirmando cu e proyecto di maneho di desperdicio lo keda financia precisamente for di e “line item” extra di 16 miyon florin destina pa proyectonan di gobierno.
Dicon ATA tin offerta desde 13 di Januari 2026?
Parlamentario Croes no por compronde con dia 28 di januari 2026, ATA a informa Parlamento cu nan NO tin informacion ainda for di gobierno riba cua proyectonan e suma di 16 miyon florin lo keda destina, mientras cu Minister Cicilia a pone algun oferta di Ecotech, cu ya tabata entrega y dirigi na ATA mes, “ter inzage” (pa inspeccion).
Loke ta lanta un interogante ta e oferta di Ecotech, cu e fecha di dia 13 di januari 2026, pa un contrato pa cinco (5) aña pa e proyecto di “Baki den Bario”. Maske a insisti cerca Minister Cicilia y ATA pa pone carta den cual ATA a solicita e oferta aki disponible, toch nan a nenga of no por a presenta e documento na Parlamento. E falta di transparencia aki ta lanta duda si e berdad completo ta wordo comparti.
Violacion di leynan di contabilidad y supervision
Fraccion di MEP ta convenci cu, den henter e proceso aki na januari 2026, ATA no a pidi Serlimar un oferta. Door di a omiti e paso aki, ATA no a cumpli cu articulo 21 di e Landsverordening instelling Aruba Tourism Authority, ni tampoco cu e Ley di Contabilidad (y e reglamento di destaho publico (aanbestedingsverordening).
No obstante cu e trabou di Parlamento ta pa controla Gobierno y vigila cu e procesonan ta cana segun ley, Parlamentario Croes ta sinti su mes decepciona di mira con parlamentarionan di AVP y Futuro ta duna sosten na un proceso cu no a cana corecto. Mas ainda, ora nan ta presenta un mocion pa purba hustifica e erornan di e Minister y di ATA. Pueblo por ta sigur cu e trabou di control riba e caso aki lo no keda te akinan.