shete inspector di Direktorado di Supervision y Mantenshon di Ley a huramenta como Agente Polisial Ekstraordinario (Buitengewoon Agent van Politie – BAVPOL). Cu e huramentacion aki, awor Direktorado di Supervision y Mantenshon di Ley ta disponi di 21 Agente Polisial Ekstraordinario – BAVPOL. Di e manera aki Direktorado di Supervision y Mantenshon di Ley tin mas inspector cu por actua dentro di e competencianan cu a otorga na nan.
Anteriormente e aña aki e shete inspectornan a finalisa nan formacion di BAVPOL exitosamente. Durante e formacion aki nan a adkeri entre otro conocemento tocante ley penal y procesamentu penal. Nan a siña tambe con nan mester actua na un manera profesional, con nan mester formula procesverbal y con nan por usa nan competencianan na e manera corecto.
Como BAVPOL e inspectornan tin cierto competencianan cu nan por usa durante nan trabou. Ki competencia nan tin cu por aplica, ta depende di nan instruccion, nan akta y e legislacion y regulacion vigente. Dentro di e cuadronan aki por ehemplo nan tin mag di controla pa verifica nan identidad y traha procesverbal.
Cu 21 BAVPOL, Direktorado di Supervision y Mantenshon di Ley por actua mesora den mas situacion, ora esaki ta cay den e competencianan di e inspector. Esaki ta fortifica e supervision y mantenshon di ley diario, y ta sigura cu inspectornan por atende na un manera mas profesional y mas efectivo cu cierto situacionnan.
E huramentacion ta forma parti di e profesionalisacion mas aleu di Direktorado di Supervision y Mantenshon di Ley. E direktorado ta sigui inverti den formacion, conocemento y desaroyo di su empleadonan. Cu esaki Direktorado di Supervision y Mantenshon di Ley kier contribui na un Boneiru safe, ordoñá y habitabel.
