Na Cas di Partido, presidente di Directiva di Partido di Pueblo Arubano AVP, Clifford Heyliger, a anuncia oficialmente cu Congreso AVP 2026 – Era di Relevo lo tuma luga diadomingo 4 di october 2026 den ballroom di Marriott Resort.
Heyliger a haci e anuncio hunto cu lider di partido Mike Eman, lider di lista Wendrick Oduber y lider di Fraccion AVP Jennifer Arends-Reyes. Como presidente di Directiva, Heyliger ta encarga cu e parti organisatorio di e congreso, cu lo representa un momento importante den historia y futuro di AVP.
Durante e congreso, miembronan lo trata cambio di statuto, e futuro di liderazgo y cambio di directiva. Tambe lo presenta e miembronan di directiva di e diferente fundacionnan cu partido tin pa formacion di miembronan, organisacion di actividadnan y desaroyo di lider- y candidatonan nobo.
Heyliger a reconoce cu tur proceso di cambio por trece pregunta of duda, pero a sigura cu partido ta prepara pa contesta tur inkietud cu miembronan por tin.
“Cambio no ta nifica cu AVP ta bandona su creencia y conviccionnan. Tur renobacion ta basa riba e mesun principionan cu AVP a mantene semper. Esaki ta e proceso den cual nos partido ta prepara pa un liderazgo nobo, cu continuidad di vision y compromiso cu Aruba,” Heyliger a declara.
Congreso AVP 2026 lo marca cuminsamento di un proceso di renobacion dentro di partido. Segun Heyliger, AVP tin suficiente boluntario cu pasion, capacidad y disposicion pa acepta e reto di un cambio di liderazgo, mientras cu nan ta sigui duna continuidad na e vision di partido.
Durante e encuentro lo presenta diferente mocion, tene votacion y conecta directamente cu miembresia pa stipula e futuro rumbo di AVP.
“Nos kier sigui duna Aruba loke Aruba ta custuma di AVP: liderazgo, dinamismo y pasion, awor fortalece cu caranan nobo y un generacion cla pa carga e responsabilidad dilanti,” Heyliger a expresa.
Como parti di e preparacionnan y proceso di reconstruccion di partido, AVP lo organisa un bingo di recaudacion di fondo diasabra 29 di augustus. E fondonan recauda lo wordo destina na e trabounan necesario pa fortalece y reconstrui partido su organisacion.
Cu Congreso AVP 2026 – Era di Relevo, AVP ta prepara pa habri un capitulo nobo basa riba renobacion, participacion di su miembresia y continuidad di e principionan cu a guia partido durante generacionnan.