Den e continuo debate den Parlamento, parlamentario di fraccion di MEP, Endy Croes, a bolbe reacciona fuertemente contra e intentonan di oposicion pa desvia atencion cu insinuacionnan personal. Croes a enfatisa cu mientras e oposicion kier hunga wega politico, e fraccion di MEP ta responde cu hecho concreto, documenta den sentencianan di te cu nuebe huez.
Segun Croes, e fondonan di 2.4 miyon florin cu tribunal a detecta tabata procedente di ganashi di terenonan cu a wordo bendi. E placa aki a wordo declara verbeurd (confisca) den e sentencianan di e caso.
Decision confirma pa 9 Huez
Parlamentario Endy Croes a haci un desglose pa demostra e solidez di e sentencia di e caso aki, splicando cu e no ta decision di un solo huez:
“E no ta un solo huez; 9 huez a tuma e decision aki: un den e prome anleg, tres huez den hoger beroep, y despues e mesun decision a wordo confirma pa cinco huez na Cassatie na Hulanda.”
Croes a subraya cu ora Parlamentario Stephany Sevinger kier bin hunga wega politico riba temanan personal of familiar, nan lo haya nan enfrenta cu documento y sentencia formal cu ta splica pueblo e berdad di loke a tuma luga.
Citanan di e sentencia: Página 37 y 38
Pa duna mas detayenan di e sentencia oficial, Croes a cita parti di e pagina 37 y 38 caminda ta papia di Realestate y e donacionnan haci:
E sentencia ta splica donacionnan den forma di gift di 40.000 florin cu a bay pa e fundacion di Benny Sevinger, tata di e parlamentario Stephany Sevinger di oposicion.
Financiamento di fiesta di quinceañera: E documentonan oficial ta señala tambe un regalo na aña di 2012 di 8.000 dollar pa paga pa e fiesta di quinceañera di e mesun parlamentario di oposicion aki.
Sinembargo Parlamentario Endy Croes a bolbe reitera cu e tata di lider di MEP a baha cu pension hopi aña pasa caba y a publica oficialmente cu e no ta partner mas den e ofcina unda el a traha.
Croes a concluye cu un advertencia cla:
“Si bo kier haci wega aki, nos tin pagina na cantidad pa keda recorda pueblo al respecto di boso mesun persona den e caso. Tin ora nos mester pone un spiel nos dilanti y wak nos mes, prome cu punta dede riba otro.