Durante e reciente reunionnan di e Parlamento Latino Americano y del Caribe (Parlatino) cu a tuma luga na Curaçao y Santo Domingo, a institui oficialmente e Comision del Caribe, un organo nobo crea pa enfoca exclusivamente riba e retonan y necesidadnan specifico di e nacionnan Caribeño.
E delegacion di Aruba a wordo encabesa pa e Presidente di Parlamento, Marlon Sneek, acompaña pa e parlamentarionan Sra. Lindor y Sra. Tomasia como miembronan di e comision. Sra. Tomasia a wordo eligi como e presidente di e Comision del Caribe nobo aki.
Un di e topiconan principal tabata e impacto di e alga sargassum (yerba di lama) cu ta afectando grandemente e costanan y e ecosistema marino den e region. Aunke Aruba actualmente no ta sufri e impacto aki intensamente, a presenta analisis di expertonan, entre nan un ex-presidente di Parlatino y ex-presidente di e Camara di Diputado di Mexico.
E expertonan a enfatisa cu e sargassum mester wordo captura riba lama halto prome cu e yega e costanan. Ora e alga yega e oriyanan, e ta sofoca e coralnan, ta kita oxigeno y luz di solo pa e piscanan, y ta genera un holo stinki cu ta afecta e sector turistico. Entre e solucionnan presenta, a propone e uzo di barconan specialisa similar na e barconan cu ta piki alga na China pa recolecta e materia prima aki y transform’e den productonan util.
Sinembargo, e lidernan a señala cu e iniciativa aki lo rekeri acuerdonan di navegacion y legislacion di buelta entre e paisnan, ya cu e alga aki ta crusa zonan economico exclusivo di diferente teritorionan.
E di dos tema di gran importancia tabata e produccion di cuminda y e cadena di consumo den Caribe. Durante e sesionnan a resalta cu prome cu inicia proyectonan di agricultura local, cada pais mester analisa dos factor crucial:
1. E patron di consumo: Loke e comunidad realmente ta come.
2. E tera y e clima: E capacidad real di produccion di e pais.
A propone un modelo di intercambio di comercio inteligente pa baha e costo nan di fleta. Porehempel, un barco cu ta transporta fruta for di Republica Dominicana pa Aruba lo por haci e ruta di regreso carga cu berdura of otro productonan produci na Aruba. E strategia aki no solamente ta reduci e costo di transporte, sino cu e ta fortalece e siguridad alimentario y e red di exportacion entre e islanan.
E discusionnan a atende tambe e sector di carni, e transferencia di tecnologia y e necesidad di establece un marco legal hunto cu otro gobiernonan pa garantisa cu e solucionnan aki por wordo implementa efectivamente den e region Caribeño.
