Riba proposicion di minister Beljaarts di Asuntonan Economico y secretario di estado
Szabo (Digitalisacion y Relacion di Reino), Conseho di Minister a bay di acuerdo pa
pone placa di e Areglo di Garantia pa Credito di MKB (BMKB) disponibel pa
empresarionan na Corsou, Aruba y Sint Maarten. Esaki ta mehora considerablemente
acceso na financiamento pa empresarionan den e parti Caribense di Reino. Esaki ta
duna un contribucion importante na fortificacion economico di e region.
Minister Beljaarts: “Empresanan chikito y mediano ta hopi importante pa economia y pa
comunidad. Nan ta garantisa empleo y ta produci mercancia y servicio cu nos ta uza tur dia.
Cu inicio di e Areglo di BMKB pa Corsou, Aruba y Sint Maarten, nos ta brinda empresarionan
oportunidadnan nobo pa realisa nan ambicionnan. Esaki ta un paso importante pa sigui
fortifica e clima di inversion y capasidad di recuperacion economico den e parti Caribense di
nos Reino.”
Tocante e Areglo di BMKB
E Areglo di BMKB ta un instrumento di ministerio di Asuntonan Economico cu ta sostene
empresarionan pa haya financiamento. Ofreciendo un garantia parcial, ta reduci e riesgo pa
financiadonan, loke ta stimula nan pa duna credito. Esaki ta haci posibel pa empresarionan
inverti den nan companianan, contribui na innovacion y promove empleo.
Ministerio di Asuntonan Interno y Relacion di Reino ta implementa e areglo. Secretario di
estado responsabel, Szabo, ta desea di traha, hunto cu gobiernonan di Aruba, Corsou y Sint
Maarten y cu financiadonan adecuado cu ta activo den e paisnan aki, pa drecha acceso na
financiamento.
Secretario di estado Szabo: “Ta hopi dificil pa empresanan chikito y mediano na Aruba,
Corsou y Sint Maarten yega na capital pa inversion. Mientras cu hustamente e
empresarionan aki ta di gran importancia pa e paisnan autonomo por para economicamente
riba nan propio pia. Aparte di bon gobernacion y finansa gubernamental solido, mi ta desea di
contribui na un miho futuro di e islanan y ey den e areglo por yuda. Mi ta spera, ora ta asina
leu, cu tur dunado di credito riba e islanan ta bay ofrece e areglo na empresarionan, pasobra
esey ta sumamente necesario.”
Impulso pa desaroyo economico
E areglo ta drenta na vigor despues di zomer di 2025. For di e momento ey, financiadonan
adecuado tin e posibilidad pa duna un garantia. E financiado por pidi e garantia a traves di
Rijksdienst voor Ondernemend Nederland.
E proceso pa sigui
Awor cu conseho di minister ta di acuerdo, e consulta di internet pa e areglo por inicia na
comienso. E ora ey tur hende ta cordialmente invita pa reacciona riba contenido di e areglo.
E documentonan ta disponibel den tres idioma y por haye bou di e rubrica: ‘Relevante
documenten’. Seguidamente lo pidi e paisnan ACS mes pa bay di acuerdo cu e areglo. E
meta ta pa e areglo dentra na vigor entrante september 2025. Esaki ta encera cu dunadonan
di credito por ofrece e Areglo di BMKB entrante september/october.
Conseho di Minister ta aproba garantia di MKB pa empresarionan na Corsou, Aruba y Sint Maarten
