Local

Curso “tuma control di bo propio salud sexual” organisa pa JongerenLoket y Famia Planea


ORANJESTAD,Aruba

Dia 28 di Januari ultimo “JongerenLoket” cu e proyecto ‘Riba Caminda Pa Trabou’ di Directie Sociale Zaken conhuntamente cu Famia Planea Aruba a organisa un dia di curso titula: “Tuma control di bo propio salud sexual”. E dia di curso aki tabata specialmente pa e grupo di mamanan soltera cu ta ricibi ayudo sociaal di DSZ. 

E prome parti di e curso tabata dirigi na e persona mes den su totalidad cu un enfoke riba su salud sexual reproductivo. Dunando e grupo meta tur informacion pa asina tin e conocemento y cualidadnan necesario pa por tuma decisionnan responsabel pa cu nan curpa, bida y futuro. 

E di dos parti di e curso tabata dirigi na e crecemento y desaroyo di nos muchanan y hobennan. Dunandonan informacion, guia y sosten pa asina yudanan cu e formacion y educacion di nan yuinan na cas, relaciona cu nan salud sexual en general. Logrando asina muchanan y hobennan consciente y determina pa cuida, proteha y respeta nan curpa y di otro. 

Por ultimo a tene un momento di evaluacion pa asina por midi kico tur a logra siña riba e dia di curso aki pero tambe compronde e importancia di papia tocante e crecemento y desaroyo di nos salud sexual den su totalidad. Un dia hopi educativo pero specialmente interactivo, cual a haci cu tabata tin e espacio pa asina por conta experiencianan relaciona cu nan salud sexual en general.

Nos por mira bek riba un dia sumamente exitoso unda cu sigur cada un persona a sa di haya mas conocemento riba e area di nan salud sexual, desaroya cualidadnan unico pero tambe motivanan pa tin un comportacion sexual saludabel. 

Nos ta contento y orguyoso di e grupo meta cu ta mustra di ta determina pa mira cambio pero specialmente tuma control di nan propio salud sexual en general.

‘Riba Caminda Pa Trabou’ ta brinda e participantenan e oportunidad pa adkeri abilidadnan indespensabel pa no solamente trabou pero tambe pa nan bida personal.

‘Jongerenloket’ kier a tuma e oportunidad aki pa gradeci e team di Famia Planea specialmente Jonathan Trinidad y Ghislaine Koeimian pa brinda un tremendo curso pa e cliente nan di ‘Jongerenloket’.

Team Jongerenloket na Departamento di Asunto Social bou di auspicio di Sociaal Crisisplan ta consisti di Project coördinator Kayla Haakmeester y project administratieve medewerker sra. Sheilah Odor.

Pa mas informacion of pregunta por tuma contacto cu ‘Jongerenloket’ na Departamento di Asunto Social na telefon 528-1100.

Related posts

Na memoria di co-fundador di MEP dokter Teodosio Lin

EA News Author

Prome Minister Evelyn Wever-Croes: Gabinete wever-croes semper a y lo duna participacion na sindicatonan

EA News Author

Prome Minister Evelyn Wever-Croes: Durante 2020 hopi atencion a bay na comunicacion entre gobierno y pueblo y maneho di crisis

EA News Author

Leave a Comment