PoliticaFeatured

drs. Mervin Wyatt-Ras: Desapunta di e falta di interes di esnan cu ta sostene gobierno pa asunto di creche y mucha special

Drs. Mervin Wyatt Ras

Durante Conferencia di prensa di partido y fraccion di AVP, drs. Mervin Wyatt-Ras a trece padilanti cu e ta lamenta con tratamento di presupuesto di anja 2022 a bai. Dicho tratamento a encera 5 dia. E Nota di Contesta ariba preguntanan di parlamentarionan (nota naar aanleiding van het verslag) a ser entrega un dia prome cu e Reunion Publico, locual ta normal pa e gobierno aki di cual dolor di nos pueblo no ta su prioridad. 

Mervin Wyatt-Ras a trece padilanti cu ta trata di un presupuesto sin vision ni proyectonan concreto describi. Un presupuesto como ehecucion di landspakketten. Un presupuesto cu a ser entrega super laat.

Un presupuesto yen medida manera BTW di 6-16%, landsbijdrage di AZV cu gobierno lo no paga mas y  recorte obligatorio di 12.6 den salario di ambtenaar y semi-ambtenaar. Tambe lo cobra comerciante chikito un suma total di 49 miyon di salaris subsidie cu a ricibi di mas.  

Ta trata pues di un presupuesto cu a haya un “dikke onvoldoende” di Raad van Advies y CAft paso enbes di baha gasto a subi gasto di goederen en diensten cu 43.7 miyon en comparacion cu 2020 y 27.5 miyon en comparacion cu 2021. Gobierno mester a drecha e presupuesto prome cu mande pa Parlamento, sinembargo gobierno no a haci esaki. 

Durante tratamento por a nota cu ministernan minister di finanzas y asuntonan general no a gusta cu ta haya critica. Den ronde di contesta di ultimo reunion nan a keda grita y papia di otro gobernacionnan, excepto duna cuenta di nan propio gobernacion. A yama tur hende pa nomber offensivo, sin bisa kico na mes ta bin cu proyecto nobo of inovacion pa Aruba. E minister cu a resalta pa su positivismo tabata Geoffrey Wever. 

Gobierno no a presenta nada nobo den un situacion alarmante financiero-economico di nos pais, pa cual nos pueblo tabata pendiente di un noticia alentador. Costo di bida a subi drastico. Cifras di CBS ta indica cu e bestaansminimum esta e minimo pa por biba di dje di un famia di 4 persona na 2017 tabata 4.338 florin mientras cu awor esaki ta 4.920 florin, cual ta un subida di casi 600 florin, mientras e gastonan a subi mas cu 600 florin. 

Pronto cu introduccion di BTW e espacio den cartera di cuidadanonan lo bira mas preta. Nos hendenan ya caba ta den un situacion sin perspectiva, no tin pan pa pone riba mesa di nan famia, no por cumpli cu debenan di awa, coriente, telefon, huur of pago di cas y di auto. No por paga debe, ni tin placa pa pone gasoline ya cu prijs di gasoline ta sigui subi, hasta prijs di pan lo subi y tin cu paga mas pa recohe sushi. Un djies enbes di yuda nos cuido medico lo introduci e di 3 wave di eigenbijdrage di AZV dor di cual nos cuidadanonan mester bai paga na specialista, na botica, pa haci test, na Spoedeisende Hulp y na Huisartenpost. Cu austerisacion di lista positivo lo bira mas caro ainda pa p.e. un mama hiba su yui specialista paso lo tin cu bai paga entre 40 pa 100 florin of kizas mas ora busca remedi tambe cu no ta riba e lista positivo dor di austeridad. Tabata di spera cu awe dia mundial di salud gobierno lo por a anuncia un alivio pa nos pueblo pero ta keda para riba medidanan mientras otro paisnan si ta sostene cuido. 

Fraccion di AVP cu semper a para na banda di nos pueblo a presenta un presupuesto alternativo pa duna nos pueblo alivio den e situacon actual. E alternativanan presenta ta pa trece alivio serca nos cuidadanonan paso mas placa nos ciudadanonan tin den cartera mas liher nos economia lo recupera. Nan ta: 1. elimina 12.6% di recorte serca personal publico y semi-publico, 2. elimina medida den cuido di eigenbijdrage y vul aan e contribucion di gobierno na AZV na 24 miyon florin, 3. garantisa ensenjansa pa un y tur dor di sostene SKOA cu 1.5 miyon pa no mester kita werkster ni hisa cobransa di schoolgeld, 4. introduci un bijstand pa famianan cu muchanan special di 0-16 anja cu ta ensera 400 hoben pa total 2 miyon florin, segun articulo nobo 8a. di e ley di Maatschappelijke Zorg.

Pa loke ta trata e bijstand na muchanan cu limitacion sea fysico y/of mental Wyatt-Ras hunto cu lider di partido Mike Eman a presenta un cambio den ley na minister di Asuntonan Social y di Husticia y no a haya reaccion. E ayudo aki ta pa sostene mayornan na momento cu nan tin cu haci un test cu nan yiu special, pa paga terapia cu no ta ser cubri, pa paga pa cuminda special pa medio di sonde cu ta sali casi 900 florin pa luna, pa cumpra un rolstoel, paga bus pa nan yiu por ser biba cu un rolstoel skol paso esaki no ta ser cubri. Tambe pa paga pa pampers, pa trece cierto adaptacion na cas y pa paga un hende pa wak pa e yiu. Varios mayor di cu tin yiu special no por laga nan yiu niun caminda dor di falta di guia adecuado y ta haya nan mes obliga di kita for di trabou y no por ni sali for di cas. Si berdaderamente nos kier traha na inclusion aki tin un caminda pa cana. Wyatt-Ras ta haya lamentable cu e coleganan cu ta sostene gobierno di Mep y Raiz no a mustra interes den e presupuesto alternativo ni e aspecto di ayudo pa mucha special. 

Wyatt-Ras a keda desapunta alabes di e falta di interes y sosten pa e mocion cu el a presenta hunto cu su coleganan di fraccion di AVP cu sosten di fraccion di MAS y Accion 21, cual ta ensera implementation di e ley di creche di anja 2017. Den ultimo tempo y hasta recientemente a tuma nota di casonan di muchanan den creche y hasta fayecimento di un baby den creche, locual ta haci reglementacion di acohida pa mucha un must pa hisa calidad y pa sosten lidernan den nan trabou. E ley di creche a ser aproba unanime den Parlamento dia juni 5 di juni 2017 y te dia di awe e no a ser implementa, apesar di suma cuantioso di 36 miyon florin cu a ser inverti den crisisplan. 

E minister encarga anterior juist a corta den e cuido aki y den Trai Merdia dor di cual a pasa creche y Trai Merdia bou di cartera di asuntonan social. Wyatt-Ras den e mocion a pidi atencion pa co-financiamento di e centronan basa riba un mocion di su fraccion fecha 5 di juni 2017. Asina crechenan por bira accecible pa tur mucha. Tambe a pidi pa reconoce e estudio cu leidsters ta haci y ta paga como di nivel di MBO. Si cumpli cu esakinan e ley por ser implementa mas liher. 

Sinembargo no a ricibi apoyo di ningun di e miembronan cu ta sostene gobierno. Wyatt-Ras a spera mas interes pa asunto di mucha y nan acohida di sikiera e politiconan “nobo” cu ta sostene gobierno. Wyatt-Ras y su coleganan si a sostene e mocionnan di e miembronan di e otro fraccionnan ora ta trata asuntonan (social) y pa mehora calidad di bida di ciudadanonan sin importa ken a presenta nan, pero di otro banda tabata falta madures pa mira interes general.

Image Scaled

Related posts

Aruba ta conose 2 caso nobo di COVID-19

EA News Author

Tourism Corporation Bonaire ta tira lus riba e esfuersonan di PR pa aña 2021

EA News Author

Tourism Corporation Bonaire ta lansa kampaña nobo riba medionan sosial pa promové enbolbimentu sosial

EA News Author

Leave a Comment

Whatsapp Message