A drenta e noticia tristo na cuminzamento di siman cu e bunita voz cu a scucha pa hopi aña diariamente na Aruba na Radio Caruso Booy 102.7 FM Stereo, den persona di Sira Booy a fayece.
Originalmente su persona a nace na Boneiro dia 31 di Januari 1946, for d e cuna di Famia Mercera, pero na un edad chikito a biaha hunto cu su familia y establece na Aruba den e bario di Weg Rooi Hundo na San Nicolas.
Despues di tempo Sira conoce e Station Manager di Radio Antillana 1270 AM kende ta e legendario Hubert “Caruso” Booy (d.f.m) cu tambe a bin establece su mes na Aruba na aña 1963 procedente di Corsou pa funda e emisora. Durante e epoca aki Radio Antillana situa na San Nicolas tawata tin como propietario Tuyo Prins (d.f.m.) y Juan Wix (d.f.m.), y Caruso tawata encarga cu maneho di emisora.
Na Aruba Sira y Caruso a contrae matrimonio y wordo bendiciona cu 4 yui den persona di Alice, Diana (d.f.m), Hubertus y Zaidee.
Na 1978 Caruso a innaugura su propio emisora y tawata historicamente e di 4 radio emisora transmitiendo riba e banda FM na Aruba cu ta “Radio Caruso Booy 102.7 FM Stereo” E Baranca di Diamante – The Diamond Channel” cu a cuminza opera originalmente for di Boulevard Center (awendia Reinassance Hotel) y durante añanan 80 a muda e emisora pa e residencia di famiia Booy situa na Generaal Majoor de Bruynewijk 49 na Savaneta.
Sira tawata sostene su esposo grandemente cu su emisora den tur aspecto, manera entre otro: traha operator tras di control den studio, anuncia programma y propaganda, coordinacion di programma, traha den e parti administrativo y alabes tawata maneha e emisora durante cu su esposo tawata tin compromiso di viahe den exterior.
Despues cu Caruso a fayece na October 1990, su esposa Sira a tuma over e maneho y a keda mantene e emisora den aire te na aña 2007 cu Radio Caruso Booy a clausura su transmission.
Alabes Sira a keda maneha e emisora cu e vision di su esposo Caruso, cual tawata pa duna oportunidad na un persona pa desaroya su talento den radio difusion. Pa medio di Radio Caruso Booy hopi talento radial a wordo forma, cu awendia ta locutor of DJ conoci den e mundo di radio na Aruba.
Sira cu hopi pasenshi y amor tawata siña tur locutor of DJ nobo cu ta bin traha na Radio Caruso Booy, con pa maneha e ekiponan den studio y con pa por haya den un forma facil disco of CD na momento cu peticion pa toca musica drenta. Tambe semper tawata dispuesto pa medio di su radio emisora yuda cualkier instancia cu mester di un ayudo.
Hopi recuerdo bunita ta keda atras di Sira como un di e pioneronan den radio difusion di Aruba cu un bunita voz tras di microfoon y esposa di e gran leyenda radial Hubert “Caruso” Booy. Hopi persona por corda e segmento musical cu e tawata programma na Radio Caruso Booy di “Canciones y Recuerdos” cu musica romantico na Spaño conoci tambe como “Boleros”.
Condolencia y hopi forza na Famia Booy y Mercera. Cu Sira descansa den Reino di Señor y su bunita voz radial y recuerdonan keda semper graba den nos curazon.
Adhunto ta presenta algun potretnan cu por recorda momentonan bunita, Algun di e potretnan ta cortesia di: Delpher.nl – Amigoe y Facebook page San Nicolas ARUBA History.
