Mientras comercio, turista y e barionan di Playa ta lucha cu e impacto di e adictonan ambulante, un realidad ta sali na superficie: e problema no ta limita na centro di ciudad. Awe mainta, durante un recorido na e lugarnan mas afecta, Eduard Pieters (PPA) a highlight e crisis di salud mental y adicto ambulante. Aruba ta falta di un maneho di politica integral y berdadero, cu ta trata adiccion y salud mental manera un prioridad nacional.
Un problema escalante
E sucesonan reciente a mustra cu e situacion ta escalando den Caya Grandi. E barionan manera; Socotoro, Companashi, Paradijs y Madiki a haci yamada urgente riba e molester, peliger y destruccion relaciona cu e adictonan ambulante. Esaki ta muestra cu Aruba ta enfrentando un fenomeno nacional y cu e solucion no por keda limita na un djis un skina di nos ciudad.
E limpieza cu KPA a haci anteriormente a duna un alivio temporario, pero e realidad ta cla: mientras cu e adictonan ambulante no ta haya tratamento, rehabilitacion y guia profesional, e problematica lo sigui crece y afecta tur bario.
Gobierno tin 5 siman sin duna contesta
“Den mesun momento cu pueblo ta pidi siguridad y cuido, Ministerio di Salubridad cu tin maneho di adiccion ainda no a contesta e preguntanan forma cu fraccion di PPA a presenta dia 22 di october. Awe ta 1 di december, mas cu 5 siman despues y ainda no tin claridad ni direccion,” Pieters a enfatisa.
Esaki ta un ruptura den transparencia y den liderazgo. Durante campaña, AVP y FUTURO a priminti di tin un procesamento rapido unda lo contesta den 2-3 siman y un plan integral y directo pa soluciona e retonan di salud mental y adiccion.
Sinembargo nos ta mirando cu ainda no tin un ley presenta na Parlamento, ni tin plan operacional, no tin fecha pa inicia cu e maneho y servicio integral y mucho menos contesta pa Parlamento.
E silencio hermetico y limpieza cosmetico aki ta haci pueblo y comercio mas vulnerabel dia tras dia.
Aruba mester trata adiccion como un cuestion di Salud Mental
Eduard Pieters a enfatisa cu e debate nacional mester cambia di tono: e adictonan ambulante no ta un asunto di “nuisance,” pero un asunto di salud mental y tratamento obligatorio.
Desde 2013 ex Minister Visser a presenta un rapport completo pa salud mental, cu ta inclui recomendacion pa preveni, trata y reintegra e adictonan ambulante.
Ta 12 aña despues y parce cu e documento aki ta tira den lachi y nos ta mira e consecuencia.
Pa alivia y soluciona e desafio aki, fraccion di PPA ta boga pa:
● Un ley nacional pa adiccion, cu ta permiti admision obligatorio.
● Un modelo integral pa tratamento, rehabilitacion y reintegracion laboral.
● Saca e persona for di ambiente dañino y pone nan den un centro cu tratamento psicosocial y medico.
● Forma cooperacion y aliansa cu comercio pa crea un ruta di independencia laboral.
● Un alianza fuerte entre minister Dowers, Wyatt-Ras y Eman.
● Apoyo pa Respaldo, cu ta wardando riba permiso y tereno pa construi un clinica pa salud mental y por ekipa nan med cu mas profesional.
Finalmente Eduard Pieters ta expresa cu e silencio hermetico aki di gobierno no por sigui mas. Aruba tin mester di liderazgo, claridad y accion. PPA ta para firme riba un punto: e adictonan ambulante tin derecho na cuido digno y nos pueblo tin derecho na siguridad y un ciudad funcional.