Local

En conexion cu continuidad di negoshinan local: KVK A SIGUI BRINDA SU SERVICIO NA E EMPRESARIO Y TA YUDA TRECE SOLUCION PA E PREOCUPACIONNAN

Kvk Y Agricultura Br 2

ORANJESTAD,Aruba

Camara di Comercio y Industria Aruba (KvK) a sigui hopi di cerca e situacion y e impacto di e COVID-19. E decisionnan cu Gobierno di Aruba a tuma pa bienestar y salud di nos comunidad tabata necesario pero a afecta comercio y economia en general. KvK no a para keto y a haci uzo di tur loke ta den su poder pa por continua y brinda servicio na negoshinan y actividadnan relaciona na e Registro di Negoshi y Registro di Fundacion.

KvK tin comecio na pecho

Durante e periodo dificil aki KvK a tene varios reunion y a duna oido na diferente preocupacionnan cu principalmente e empresanan chikito y mediano ta confrontando. KvK a expresa su opinion na Gobierno y asina duna aporte pa facilita p.e. e pasonan pa aplica na FASE y e areglo cu Gobierno a inicia pa yuda e negoshinan mediano y chikito (MKBs). Alabes KvK a comparti su punto di bista pa locual ta trata e loonsubsidie. KvK ta duna informacion na e comerciante encuanto e diferente ayudo cu ta disponibel na nan y lo sigui monitor e desaroyonan. Como stakeholder tumando parti den diferente comision, KvK ta duna consehonan na bienestar di e comunidad comercial y alabes ta brinda conseho directo na diferente Minister pa yuda e empresario chikito y mediano.

KvK a keda activo

No obstante e situacion caminda cu negoshinan mester a cera pa publico, KvK a haci tur posibel pa su servicio na publico keda disponibel. Hopi atencion a wordo duna na e posibilidadnan digital cu KvK ta brinda via su website www.arubachamber.com caminda e cliente tin acceso na servicio y informacion. Clientenan por consulta nan account digital via Mijn KvK/My Chamber y haci transaccionan, manda e-mail pero tambe busca informacion via e chattool disponibel via e website di KvK. E chattool ta un bon forma pa e cliente haya ayudo rapido sin cu e mester pasa oficina di KvK. Via e canalnan cu KvK tin disponibel, e staff di KvK ta semper cla pa yuda cu cualkier pregunta cu e empresario por tin relaciona cu su negoshi.

Na april 2019 KvK a introduci su plataforma digital nobo, locual cu a facilita e proceso pa den e crisis actual KvK su team por a traha y keda den contacto cu otro for di cas y cu ocupacion limita na oficina, continuando cu e proceso y tramitenan esencial di KvK. Documentonan manera statutonan y duplicadonan, pedida di extracto historico, Ministeriële Beschikkingen (permisonan cu ta drenta via DEZHI) a sigui wordo procesa. A ricibi hopi peticion online pa cu compra di productonan, inscripcion y cambionan den negoshi cu tambe a wordo procesa exitosamente. Pagonan por a wordo realisa online y asina e cliente por a cumpli cu e.o. pago di registracion di su negoshi.

E siman aki KvK a habri su oficina parcialmente pa publico y entrante 18 di mei proximo lo habri na e orario normal di 8.00 am pa 4.30 pm pa duna servicio encuanto benta di producto, pago di contribucion anual di registracion di negoshi y entrega di documentonan. KvK kier conseha publico pa keda haci uzo mas tanto posibel di e servicionan digital pa asina evita fila na e oficina di KvK y por uza e tempo mas eficientemente. E ta importante pa e empresario tin su cuenta digital via My Chamber y di e forma aki tin tur acceso na su propio informacion y servicionan di KvK relaciona cu su negoshi.

Evolucion di servicio awo en adelante

KvK ta continua na brinda servicio den forma di informacion na e cliente y esaki ta inclui su eventonan. Pronto e departamento di Business Information and Support lo informa e comunidad encuanto e planning pa eventonan digital. KvK a sigui brinda su cursonan Financiële Administratie voor Beginners (FAB) y Empresario Independiente (EI). Lesnan di FAB a continua den bon forma via Zoom meetings. Di e forma aki KvK lo mantene su servicionan y cursonan usando diferente plataforma di comunicacion. KvK ta keda explora e posibilidadnan y asina continua cu e servicionan digital.

Aruba, 15 di mei 2020

Camara di Comercio y Industria (KvK)

Kvk Y Agricultura Br 2

Related posts

Entrante diaranzon 25 di augustus ta drenta na vigor cambio den edad di test pa drenta Aruba

EA News Author

Hopi negoshi mes un cos no ta sano pa economia di Aruba

EA News Author

Poder di Museonan

EA News Author

Leave a Comment

Whatsapp Message