KRALENDIJK,Bonaire
Ta importante ku tur organisashon ku ta dediká nan mes na víktimanan di violensia doméstiko i maltrato di mucha ta traha mas tantu huntu ainda i asumí un posishon fleksibel. Esaki ta loke direktor Silvana Janga-Serfilia di Komunidat i Kuido a enfatisá durante un enkuentro kaminda atendementu ku violensia doméstiko i maltrato di mucha tabata e tema prinsipal. E enkuentro a tuma lugá dia 29 di febrüari. E tópiko tabata kon por regla dunamentu di servisio na víktimanan di violensia doméstiko i maltrato di mucha mas mihó i mas rápido ainda. Na Boneiru diferente organisashon ta okupá nan mes ku atendementu ku violensia doméstiko i maltrato di mucha. Pa un bon atendementu ku violensia doméstiko i maltrato di mucha ta nesesario ku tur organisashon di un manera òf otro ta bai traha huntu. I ku nan ta dispuesto pa adaptá nan mes. Den práktika no tur biaha esei ta bai asina fásil. E organisashonnan ku tabata presente na e enkuentro a deklará ku nan ta disponibel pa traha a base di e mesun atendementu. Tambe nan a deklará ku nan ta kontentu ku e interkambio di idea. Durante e enkuentro a papia hopi tokante e Family Justice Centre – Sentro di Hustisia pa Famia. Esei ta un sitio kaminda tur dunadó di ayudo ta ubiká bou di un solo dak. Por ehèmpel un dòkter di kas, un polis i un trahadó sosial pa guia di famia. E intenshon ta pa na aña 2021 habri un Family Justice Center na Boneiru. Inge Berber, mènedjer di programa violensia doméstiko i maltrato i Ingrid Sealy, hefe di departamento di Desaroyo Sosial (Maatschappelijke Ontwikkeling en Arbeid – MOA) di Entidat Públiko Boneiru a presidí e enkuentro.
