Un di e temanan central cu a bin dilanti recientemente den cuadro di e conmemoracion di abolicion di sclavitud, ta e importancia di preserva e historia bibo y e identidad cultural a traves di generacionnan. Jason Fullink, ex-presidente di e plataforma di sclavitud na Corsou, a comparti un reflexion profundo riba con e structura di nos comunidadnan a cambia radicalmente cu entrada di tecnologia moderno y con esaki ta afecta nos conexion social.
Segun Fullinck, prome cu tecnologia a domina bida diario, e bario tabata hunga un papel crucial den formacion di e ser humano. “Prome cu tecnologia a drenta, bo bario tabata hopi importante. E bario y of centro di Bario tabata e scol cu a forma e comunidad,” Fullink a splica. El a recorda con e bida comunitario tabata sinta den e asambleanan di fiesta di cosecha, e centronan di bario, misa, e eventonan di tambu, e veld di baseball y e cushina na cas. Tur esakinan tabata luganan caminda e comunidad tabata bin hunto y caminda e cultura tabata wordo pasa over di un generacion pa otro.
E ex-presidente a subraya e balor di e centronan di bario como e punto di encuentro caminda e diferente generacionnan tabata topa e interactua. Sinembargo, el a expresa su preocupacion pa e realidad actual: “Lamentablemente, esey tiki tiki ta birando menos pasobra tin tecnologia. Y tecnologia ta pone cu bo ta perdiendo e contacto ey cu otro di generacion pa generacion.” Pa Fullink, e contacto directo aki ta sumamente importante pa e sobrevivencia di e identidad y e cultura di un pueblo.
Libertad, resistencia y e poder di e tambu
Den su discurso, Fullink a referi tambe na e significacion di e dia di emancipacion y abolicion di sclavitud. El a splica cu maske abolicion a kibra e cadenanan fisico, e libertad cu e pueblo a haya back tabata bay hopi mas leu cu simplemente stop di haci trabao farsa. E tabata encera e derecho pa e comunidad por a biba, papia y traspasa nan cultura cu dignidad y sin limitacion.
Como ehempel di e resistencia aki, el a menciona e instrumento di tambu:
Nos ta papia di con tambu a sobrevivi, pasobra hopi nan a binga toch pa contene e tambu. Pasobra e poder cu tambu tin, tabata algo cu nan tabata considera peligroso. Como cu nan no por a comprende, ni nan no por a controle, nan tabatin cu prohibie.”
Maske tabatin intentonan pa scapa e expresion cultural aki, e tambu a sobrevivi anyway. Fullinck ta insisti cu ora nos ta papia di libertad, nos no por keda keto, pasobra e hende liber semper ta den movecion y ta lucha pa mantene su herencia.
For di “esclavo” pa “sobreviviente y rebelde”
Un punto clave cu Fullink a trece dilanti ta e forma con ta uza e lenguahe pa describi e periodo di sclavitud. El a coincidi cu e pensamento cu e terminologia mester cambia. En bes di papia di “sanger di esclavo,” mester papia di “sanger di persona, sanger di sobreviviente.”
Esclavo tabata lo cual nan a pasa aden, pero loke nan ta, ta survivor (sobreviviente), loke nan ta, ta rebelde,” Fullink a declara firmemente. El a splica cu e personanan aki a rebeldia y a sobrevivi un situacion cu normalmente tabata diseña pa likida nan.
Finalmente, Fullink a habri un cuestionamento riba e cifranan oficial di e trafico di catibo. El a splica cu e cifranan cu nos conoce structuralmente ta solamente esnan cu a wordo ‘registra’. Sinembargo, tabatin un gran cantidad di pirateria caminda diferente nacion tabata bay na e costa di Africa pa horta hende. Como cu e mercadona aki no tabata sanciona pa e gobiernonan y tabata opera den un mercado ilegal, hopi di e cifranan real ey nunca a sali den e registronan oficial.
E hecho cu e hendenan aki a pasa den tur loke nan a pasa aden pa 300 aña di lucha, y cu asina mes nan a logra pa algo di nan raiz sobrevivi, esey ta e herencia cu nos tin cu percura pa e keda existi,” Fullink a conclui.