Despues di a lesa e articulo publica 6 di maart 2025 den 24.com titula “GOBIERNO NO MESTER PAGA MANOR PASOBRA NO TA RESPONSABEL MAS PA RWZI” ta apela na nos gobernantenan y e sector hotelero pa asumi responsabilidad pa 40 aña di mal funcionamento di RWZI y contaminacion costero.
Gobierno ta existi pa proteha e pais y esaki ta inclui e derecho di su habitantenan. Hotelnan ta brinda e pueblo local oportunidad economico y ta aumenta nan seguridad social-economico.
Desde estudio di aña 1988, gobierno a reconoce e mal funcionamento di e RWZI cu tabata causa molester di holor stinki. Gobierno conscientemente a sigui otorga permiso pa mas hotel y infrastructura sin mehoracion adecua di e situacion. Aunque tabata na altura cu mehoracion technico pa proteha naturalesa y socioeconomía tabata urgente.
Segun estudio di 2017, e ‘Fondo pa Desaroyo Aruba’ no a yega na renovacion y expansion di e RWZI Bubali aunke cu gobierno a reconoce cu esaki ta necesario pa garantiza sostenibilidad. E capacidad a wordo surpasa dor di e cantidad di awa di riool, principalmente di hotel. Pero debido na capacidad limita di persona a duna prioridad na proyectonan ‘urgente’, manera conecta mas edificio na e RWZI Bubali.
Na 2018, TNO Caribbean a raporta cu e planta tabata procesa casi dos biaha su capacidad, 8,607 m³/dia na lugar di 4,500 m³/dia. Na 2019, gobierno a midi cantidad di contaminacion cu ta bay lama y a resulta cu e ta mil biaha mas halto di e calidad necesario pa bida marino por keda saludabel. Segun Carmabi na 2019, a confirma cu esaki ta aumenta alga y bacterianan dañino causando desaparicion di coral y pisca afectando henter e costa pa zuid y pabao.
Con por ta cu na 2025 gobierno no ta responsabel mas siendo na altura di datonan?
Na otro banda, e hotelnan ta den e capacidad financiero pa implementa sistemanan decentralisa unda localmente nan por procesa nan propio awa y uza parti di dje pa nan operacionnan. Tin ehempelnan di sistemanan decentralisa na Aruba implementa pa DOW.
Ademas, hotelnan por implementa un ‘water management plan’ pa: reduci e cantidad di ‘rioolwater’ cu ta bay e RWZI Bubali, conserva e uzo di awa dushi, reduci e cantidad di contaminantenan cu ta den e ‘rioolwater’ y percura pa su funcionamento. Sinembargo, te 2023 ningun hotel costero tabata tin un ‘water management plan’ pa reduci pression ariba RWZI, un abuso y negligencia cu ta resulta den e.o. dumping di vet. Causando e pompnan pa pega y awa ta subi tera dilanti Riu. E ‘water management plan’ ta fundamental pa ‘turismo sostenibel’.
Con hotelnan costero na 2025 no ta responsabel siendo contribuyente mayor di ’rioolwater’ na RWZI?
Ki ta berdaderamente pasando kinan?
Cada gobierno y desaroyador di hotel ta trasplasa e problema y solucionnan na e proximo generacion. No por gaba surplus den finanzas publico ora infrastructura y personal crucial no ta presente pa preveni inhusticia ambiental y intergeneracional, esta protecion di e habitante. Semper e proximo generacion tin cu lidia cu e impacto y negligencia di ambos partido. Awo a pasa herencia di 40 aña di impactonan y deterioro di e RWZI Bubali na un compania nobo di pueblo (Aruba Wastewater Sustainable Solutions). Mientras ta impone impuesto riba turista excluyendo solucionnan integral y duradero.
Como cuidadano preocupa mi ta desea mi gobernantenan y e sector hotelero ‘level up’.
E minimo cu gobierno y sector hotelero por haci ta pidi e pueblo dispensa pa e maneho iresponsabel den pasado y anuncia un fin na e polarización di e asunto pa garantiza husticia ambiental y intergeneracional. E solucionannan ta exigi un compromiso y union real entre ambos partido, pa yega na entre otro:
Expandi y modernisa RWZI Bubali pa atende e realidad actual.
Introduci sistemanan decentralisa den hotelnan pa reduci carga riba e sistema central.
Hotelnan ta implementa un ‘water management plan’ pa reduci consumo di awa y contaminante den e riolering.
Transparencia di gobierno den decisionnan relaciona cu infrastructura y medio ambiente pa yega na ‘informed consent’.
Si no implementa esaki cu maximo urgencia, ta scohe pa bay contra di e derecho humano pa un medio ambiente sigur, limpi, saludabel y sostenibel.
