E situacion di entrega di 12.6% di empleadonan publico no ta algo cu Gobierno ta implementa pasobra nan kier hacie. E mester tuma luga pasobra de lo contrario mester manda un gran parti di e aparato publico cas. Esaki ta loke cada sindicato kier? Sinembargo e mal informacion cu algun sindicato ta dunando , prinsipalmente esnan cu tin un agenda politico, ta haciendo nan Trabao realmente DI SINDICATO ?
Minister di Finanza Xiomara Maduro a tene diferente sesion cu sindicatonan pa splica con e recorte necesario ta bay tuma luga. Den e salario mes ta bay tin 5% di e total di 12.6%. E resto ta bini di 4.2% di vakantie-uitkering y 1.7% di reparatie-toeslag y najaarstoeslag.
E mandatario a splica varios biaha den sesionnan informativo cu pa e proximo 6 lunanan Aruba ainda ta depende di yudansa den forma di prestamo di Hulanda pa por cubri nos necesidad financiero. Pa ricibi e prestamo tin condicion, Hulanda no ta presta sin pone condicion. Un di e condicionnan ta reducción di gastonan. Hulanda no ta bay presta placa pa costea e gastonan halto di sector publico na Aruba.
Den sector publico tin departamento cu ta haci cierto trabounan cu en realidad ta tarea di sector priva. Hustamente e departamentonan aki a wordo yena cu trahadonan y contratistanan cu ta difícil pa pone un banda. Esaki ta e motibo tambe, hunto cu proyectonan PPP, cu a haci cu presupuesto di Aruba a sali for di tur proposicion. El a causa un aumento desproporcional den gastonan y debe di Gobierno. Pa mala suerte di mundo, e pandemia di COVID a yega y a empeora e situacion entre otro di Aruba.
Loke e mandatario ta lamenta ta cu despues di e sesionnan riba Facebook ta bin cuestiona cierto asuntonan, mientras cu e profesionalnan di Departamento di Finanza a sinta pa hinca tur informacion lo mas cla posibel pa e sindicatonan, cu mester hiba e informacion pa su miembronan. E mandatario a bisa: “Profesionalnan di Departamento di Finansa a brinda informacion di Aruba su Finansa Publico na tur sindicato. A splica na placa chikito cu Aruba sigur pa e proximo 6 lunanan ta depende di prestamo di Hulanda pa por cubri e necesidad financiero.
A mustra kico tabata e retonan financiero prome cu COVID19 y con mas hopi reto a bin despues di e pandemia. A splica tur cu sin e placa aki cosnan lo ta pio pa Aruba. Ta 1400 miyon florin a haya presta di Hulanda. P’esey awe ta incomprendibel con tin sindicato kier sembra panico y busca manera di lanta Pueblo. Ta opocicion di AVP sa haci cosnan descabeya asina y pone Aruba na peliger.”
Ta pa decadanan caba tin critica riba e aparato publico. Salarionan astronomico cu finalmente a logra cambia pa Wever Croes Norm. E cambionan ta necesario pa hiba e presupuesto di pais Aruba bek den balans.
E otro opcion lo ta pa manda un gran cantidad di empleado publico cas y stop cu subsidio di diferente fundacionnan. Esaki ta algo cu ningun Gobierno kier y ta opta pa trece un balanse unda cu tur hende ta sigui haya un entrada. E ta un of e otro, pero manera cu e ta awo e no por keda. Esnan den sector priva so no por bay carga tur peso.
E situacion di COVID no ta na Aruba so ta pasando, pero rond mundo tin problema cu finansas unda cu un pais tine mas duro cu otro. Sinembargo sigur e paisnan den caribe cu ta Aruba Corsou y St Maarten tine mes un dificil unda cu trahado publiconan mester contrbui. Tristo di mira sindicatonan ta lanta un pueblo y manipula su miembronan, e mes un miembronan cu ta paga nan y nan ta wordo mal informa y informa. Pesey mes ta importante cu cada un di e miembronan aki wak unda nan placa ta bay y busca mas informacion di kico ta e realidad. Nos como cuidadano mester por educa nos mes den diferente area y sali na vanguardia di loke ta e realidad y no dies bay tras di un persona so.