Ku e veredikto di korte ta konfirmá ku Karta di minister Janga ta kontra interes di pueblo

Ayera a bira konosi e veredikto di korte di apelashon kaminda accountant anterio di Stichting BZV a bai kontra Stichting BZV. Manera ta konosi e kaso aki a hala hopi atenshon ultimo despues ku Minister di Salubridat, Medio Ambiente i Naturalesa a manda pa e vereffenaar nan pa para e tur investigashon, kaso den korte i ehekushon di veredikto.

Riba e karta aki Frakshon di MAN a pidi un reunion publíko ku e minister pa debatí riba e karta aki. Den e reunion aki frakshon di MAN a entrega un moshon di deskonfiansa kual no a risibi sosten di mayoria. Te ku dia di awe ku sosten di partidonan MFK i PNP e minister ta den funshon sin a remedia e akshon tumá kontra di tur regla di integridat i rèspèt pa trias politika.

Ku e veredikto di korte aki ta indiká bon kla ku e akshon di e minister pa manda e karta pa vereffenaar nan ta kontra interes general. E veredikto ta indiká bon kla ku e accountant mester paga Stichting BZV kasi 4.1 mion bèk.

Frakshon di MAN ta kontentu ku nos trias politíka a funshoná i ku e minister di Salubridat, Medio Ambiente i Naturalesa no por stroba òf empedí un proseso hudisial, kaminda ta tuma akshon kontra personanan ku a komete aktonan kontra di regla i prosedura.

Lamentabel ta ku te dia di awe e minister no a tuma ningun akshon riba e fayo ku e mes a indiká ku el a hasi. E karta a keda riba mesa i su efektonan pa ku integridat di e minister i gobièrnu a keda tacha. Den mesun rosea Frakshon di MAN a pidi un reunion di komishon sentral ku e vereffenaar nan di Stichting BZV pa asina parlamento i pueblo por haña informashon i klaridat riba loke a sosode den BZV.