E Ministernan di Salubridat di Aruba, Kòrsou, i Sint Maarten, huntu ku e Sekretario di Estado di Ministerio di Salu, Bienestar i Deporte di Hulanda, a konvoká djaweps, 20 di novèmber 2025, na Sint Maarten e Konsulta di Kuater Pais riba Salubridat Públiko. E diálogo anual di nivel haltu aki ta keda un pilá pa gobernashon di salu kordiná i desaroyo di maneho konhunto den Reino Hulandes.
E konsulta di e aña aki, e promé for di 2023, a trata retonan di salú públiko kompartí i oportunidatnan stratégiko pa koperashon regional mas profundo. E agènda a enfoká riba áreanan di prioridat inkluso:
Reforsá kuido di salú ku ta pasa frontera i preparashon pa pandemia
Fortalesé kapasidat di reakshon den krísis i desaster
Avansá inisiativanan konhunto den salú mental, prevenshon, i promoshon di un estilo di bida salú
Mehorá kontinuidat di kuido, desaroyo di forsa laboral, i kapasidat di entrenamentu den henter e sektor di salú
Resultadonan
Pa loke ta trata preparashon pa pandemia i kombatimentu di malesanan kontagioso, e kuater paisnan ta di akuerdo riba e desaroyo kontinuo di Dutch Caribbean Public Health Expertise Network (DuCaPHEN) . Ku esaki nan ta reforsá e kompromiso kompartí pa interkambio di eksperto i kordinashon regional riba tereno di salú públiko. E paisnan a reafirmá tambe nan intenshon pa traha pa legislashon di salú públiko harmonisá den e parti karibense di Reino, ku atenshon spesífiko pa e tereno di kuido di salú mental inboluntario i referensia ku ta pasa frontera di klientenan di salú mental.
E kuater paisnan ta tuma pasonan pa mehorá preparashon pa krísis, loke ta esensial pa garantisá ku Reino Hulandes por reakshoná di un manera kordiná i efektivo kontra kualke krísis di salú.
Kompromiso Kolektivo
E konsulta, organisá pa Minister di Salú Públiko, Desaroyo Sosial i Labor di Sint Maarten, a terminá ku e firmamentu formal di konklushonnan ku ta enfatisá nan kompromiso kolektivo pa reforsá sistemanan di salú públiko i koperashon den Reino.
Minister Richenel Brug (Sint Maarten): “E akuerdonan di awe ta reflehá nos resolushon kompartí pa konstruí un sistema di salú públiko resiliente, reseptivo i kolaborativo pa e hendenan di nos islanan. Fortalesé e asosiashonnan aki ta esensial pa salbaguardiá salú i bienestar den henter e parti karibense di Reino.”
Minister Roderick Middelhof (Kòrsou): “Ta konstruí un sistema di kuido di salú fuerte riba preparashon, prevenshon, bienestar mental, kalidat i un forsa laboral kapas. Dor di komprometé na e prinsipionan aki huntu, nos ta fortalesé nos resiliensia kolektivo.”
Sekretario di Estado Judith Tielen (Hulanda): “Pashèntnan ku tin mester di kuido di salu mental kompleho ta entre esnan mas vulnerabel. Nos ta tuma akshon pa nan, dor di reforsá e kuido di salú mental pa tur siudadano den Reino. Ku nos esfuersonan konhunto nos tin komo meta pa krea konekshon entre nos lei i regulashonnan riba tereno di kuido di salu mental inboluntario. Mi ta berdaderamente gradesido pa e boluntat di kada pais pa yuda ofresé e servisionan aki na pashèntdi e islanan kaminda e tipo di kuido ei no ta disponibel ainda.
Minister Melvin Wyatt – Ras (Aruba): “Mi ke rekonosé un momentu importante pa Aruba. Nos tin e honor di tuma e presidensia di e Konsulta di Kuater Pais pa e aña benidero. Ta un responsabilidat ku nos ta risibí ku kompromiso i orguyo. Nos ta ansioso pa organisá e siguiente seshon i sigui ku e trabou ku nos a avansá di forma kolektivo awe. Aruba lo hasi esfuerso pa sigui fomentá koperashon, inovashon, i union den Reino — semper guiá pa e konvikshon ku un Reino mas salú ta en bèrdat un Reino mas fuerte.”
