E decision historico di Gobierno di Aruba pa cera definitivamente un capitulo di casi un siglo di industria petrolero y habri un caminda nobo pa un futuro sostenibel a capta amplio atencion den e medionan di prensa Hulandes, entre otro NOS, Trouw y otronan.
Den e publicacionnan recien, e medionan a resalta e cambio di direccion cu Aruba ta tuma despues di casi 100 aña di dependencia economico di petroleo. Segun NOS, “refineria na Aruba ta cera definitvamente, Hulanda lo yuda cu desmantelacion”, mientras Trouw a menciona cu “Refineria di Aruba ta cera, Premier Schoof ta papia di decision grandi”
Desde 1924, cu yegada di Lago Oil and Transport Company na San Nicolas, Aruba a ocupa un papel strategico den e mundo di refina petroleo. E industria cu pa hopi aña tabata e curason di Aruba su economia.
Reconociendo e cambio mundial y nesesidad urgente pa sostenibilidad, Prome Minister Mike Eman y su gabinete a tuma e decision pa cera pa semper e era petrolero. E area di e refineria lo keda transforma den un zona industrial berde, un espacio pa innovacion tecnologico, energia renobabel y economia circular.
Pa apoya e transicion energetico y ambiental, Gobierno Hulandes lo duna Aruba 110 miyon florin, y lo colabora den e parte tecnico y di conocemento pa sanea e zona industrial na San Nicolas den e manera mas eficiente y sostenibel posibel.
E paso aki, segun e Gobierno di Aruba, ta simbolisa un cambio di mentalidad nacional. Cu e decision aki, Aruba ta no solamente cera un capitulo di su historia industrial, sino ta reafirma su posicion como un pais chikito cu pensamento grandi, y cu ta pone e bienestar di su pueblo y di su medio ambiente den centro di su desaroyo.
Press release: Gobierno di Aruba
