Un reunion entre
Aruba, Curacao y Sint Maarten caminda a trata diferente topico di interes mutuo y tambe
puntonan cu lo bay keda trata den e reunionnan di IPKO dianan 7 te cu 10 di juni 2024.
IPKO ta Interparlementair Koninkrijksoverleg cual ta un reunion cu ta tuma lugar dos bes pa
aña entre e Parlamentonan di Aruba, Corsou, Sint Maarten y Hulanda.
Durante e reunion tripartiet nos a atende diferente puntonan di agenda. E dia ta habri caminda
cada pais ta duna feedback riba puntonan cu ta regarda ultimo reunion y cu ainda ta riba
agenda. Mi mester bisa cu finalmente a fiha cu pa fin di juni 2024 tur 3 isla lo a trata e
concepto di Geschillenregeling den nan parlamento. Asina tambe porfin nos por inicia e fase
di entrega di e concepto por cana su caminda.
Parti mainta nos a trata e punto salubridad publico caminda atencion special a keda poni riba
GGZ y cuido di nos grandinan. Salud mental ta un punto di preocupacion pa tur 3 isla. Nos a
trata e infrastructura di cada isla riba e tereno aki, kico ta e retonan y con cada pais ta
atendiendo cu esaki.
Despues di lunch nos a duna un biaha mas atencion special na enseñansa. Pa ta mas specifico
e situacion y retonan di nos studiantenan na Hulanda. Un punto cu mi persona un biaha mas a
pone riba agenda.
Ya pa 3 aña nos ta atendiendo cu e retonan di nos studiantenan riba nivel parlamentario. Meta
di keda pone e topico aki riba agenda ta pa yega na solucion concreto y structural pa haci e
startpositie di nos studiantenan miho, enforsa nan fundeshi y asina mas studiante logra nan
meta pa termina nan estudio. Como punto di salida ta uza e resultado di e investigacion di e
Ombudsman di Hulanda yama “Kopzorgen van Caribische Studenten”. E ultimo aki ta
indica claramente e retonan y ta duna posibel solucionnan. Mi ta di opinion cu nos mester por
uza e plataforma di Tripartiet y IPKO pa yega na solucionnan concreto pa problemanan di
nos studiantenan.
Nos por a wak con via e plataforma aki y via Vierlandenoverleg nos a logra bin cu un
solucion pa e problematica di BSN nummer cu mayoria di nos studiantenan ta hayanan cu ne.
Entrante e aña aki nos studiantenan lo por haya esaki prome cu nan subi avion. Cu e number
aki nan por habri cuenta di banco, cera contracto di vivienda y regla cosnan practico. E biaha
aki mi a pidi atencion pa e situacion di Free movers, problema di seguro (basico y priva y
zorgtoeslag), proceso di draagkrachtmeting pa nos studiantenan cu ta bin bek Aruba,
preocupacion encuanto salud mental di nos studiantenan, posibilidad pa bin cu incentivo pa
nos studiantenan bin bek nos islanan pa traha (kwijtschelding).
Otro aspectonan cu nos a atende e concepto di ley di Reino pa loke ta trata proteccion di
persoonsgegevens. Nos a haya un presentacion tecnico al respecto y mi mester bisa cu e
topico ta keda uno hopi tecnico. Finalmente nos a atende e necesidad di un posibel fondo di
Reino pa atende cu cambionan climatico.
Un dia largo pero sigur uno fructifero. Mi lo sigui informa e dianan nos dilanti con e
reunionnan ta bayendo.