Durante su conferencia di prensa di diahuebs, parlamentario Eduard Pieters di fraccion di PPA a
lansa un alerta serio riba e situacion di salud na Aruba. Segun Pieters, e preocupacion no ta
teorico, ta humano. Den e ultimo dianan, hopi ciudadano a acerc’e cu angustia y indignacion
tocante nan sernan keri cu a fayece den hospital sin cu famia a haya un splicacion cla of
adecuado. Ora confiansa den sistema di salud cuminsa kibra, e pais completo mester para
alerto.
Un sistema bou di presion humano y profesional
“E señalnan ta preocupante! Un banda, tin e famianan cu ta cuestiona si nos sistema di salud ta
funciona cu transparencia y humanidad. Y di otro banda, tin e profesionalnan dedica cu ta traha
cu alma y curason, pero cu ta visiblemente cansa y frustra door di e orarionan largo y presion
constante. No por ignora e realidad aki, unda tin un sistema cu no por sostene e sentimento di
tanto pashent como personal medico ta sinti nan mes no protegi,” Eduard a señala.
Conflicto institucional cu ta mina confiansa
Segun Eduard Pieters, pa empeora e situacion, recientemente den e medionan di comunicacion
a reporta un disputa entre Stichting Verpleging Aruba, cu ta e entidad cu ta maneha hospital y
Inspectie Volksgezondheid Aruba (IVA). E discusion ta draai rond si Inspectie tin autoridad legal
pa haci cierto inspeccion na hospital. Hospital a manda un carta na minister di Salubridad
Publico, Mervin Wyatt Ras, alegando cu e accionnan di IVA no tabata claramente fundamenta
den cuadro legal.
“Pero pa PPA, e pregunta principal ta otro: si realmente no tin nada pa sconde, pakico
resistencia contra inspeccion? Inspeccion no ta un castigo, ta un instrumento pa evalua, coregi
y mehora servicio. Ora bida di hende ta den wega, transparencia mester ta e norma, no e
excepcion,” Eduard a expresa.
Confiansa publico ta desgastando
Algun luna pasa, un ciudadano a presenta e kehonan formal contra hospital, algun activista a
tambe a entrega un manifiesto expresando falta di confiansa den e sistema di salud na hospital
y hasta un ex-minister di Salubridad Publico a papia di desconfiansa general, no solamente riba
trato di pashent, pero tambe riba con ta trata e profesionalnan.”
Mas preocupante ainda ta loke Pieters a describi como un “cultura di miedo”. Hopi famia no ta
tribi pa entrega denuncia formal, paso nan tin temor di represaya, mientras nan familiar ta
ainda hospitalisa. Esaki ta crea un silencio hopi peligroso.
Pieters a haci algun pregunta directo:
“Ken ta para pa e pashent? Ken ta defende e adulto mayor vulnerabel? Ken ta para pa
famianan cu ta busca husticia?”
Un yamada pa accion urgente
Tocante salud publico, fraccion di PPA ta exigi pa yama un reunion publico cu caracter di
urgencia, no solamente pa trata e disputanan actual, pero tambe pa papia abiertamente riba
salud en general, pues mental tambe. Esaki ta e retonan cu ta creciendo barbaramente den nos
comunidad. “PPA ta urgi gobierno pa actua decisivamente y bin cu solucionnan efectivo y
eficiente, specialmente pa nos pashentnan mas vulnerabel, manera adulto mayor,” segun
Pietes. Na mesun tempo, Inspectie Volksgezondheid mester haya e espacio pa cumpli cu su rol y duna
recomendacion profesional pa mehora e servicio hospitalario. Mehorando e servicio, nos por
garantisa mas atencion, mas seguridad y finalmente un calidad di cuido digno pa tur hende na
Aruba. “Fraccion di PPA ta afirma cu silencio no ta un opcion. Si tin keho, mester tin investigacion. Si tin
señal di problema, mester tin accion inmediato. Unda tin huma, tin candela y ignora esaki ta
pone bida na riesgo. Aruba mester un sistema di salud cu ta inspira confiansa, cu ta proteha
pashent y profesional y cu ta opera cu total transparencia. Pasobra na final, nos no ta papia di
politica, nos ta papia di bida humano,” Eduard a finalisa bisando.