ORANJESTAD,Aruba
Parlamentario Endy Croes a splika cu diahuebs mainta den sala di Parlamento di Aruba acting Promer Minister Andin Bikker acompaña pa Minister Xiomara Maduro, Chris Romero y Rudy Lampe a brinda Parlamento e documentonan di 218 pagina ter inzage. Pues por miranan un rato pero no por ricibi nan pa studianan debidamente. Esaki ta despues cu Promer Minister Evelyn Wever Croes a bisa promer cu el a sali pa Hulanda cu e lo manda e documentonan aki Parlamento y lo carga e responsabilidad di cualkier consecuencia di Reino como cu nan ta documentonan secreto cu pa Reglement van Orde Hulandes e por hañe den problema. Promer Minister a splika cu e transparencia y principio di bon gobernacion cu tanto Hulanda y su persona ta para pe ta incomprendibel con Hulanda ta exigi pa su persona sconde e documentonan aki pa Parlamento.
/// Imposibel Parlamento studia e documentonan aki den algun minuut:
Ta practikamente imposibel pa Parlamento studia e documentonan aki cual ta representa e deseo di Hulanda pa cambia nos Status Aparte a cambio di un saco di plaka ( 204 miyon florin) anto mei mei den un crisis munddial. Parlamento a gradisi tur e Ministernan y nos Minister Presidente pa nan gesto elegante contra regla di Reino pa toch pone e documentonan aki ter inzage pa Parlamento. Mismo momento a splika cu e tempo ta asina cortico ja cu diabierna dentro di algun ora Hulanda lo tuma un desicion. Pa e motibo aki a escohe pa entrega un mocion urgiendo gobierno pa entre otro No firma Rijkswet Caribische Hervormingsentiteit ni tampoko RFT y propone otro alternativanan.
/// Landspakket di CHE lo manda 1500 empleado publico cas:
Den e quickscan cu nos a logra hasi hopi den pura por a tuma nota cu e deseo di Hulanda ta pa mediante un Rijkswet ( wetkader Hulandes) forma un Caribische Hervormings Entiteit. Esaki lo tuma lugar bou leynan hulandes y un ZBO model esta Zelfstandig Bestuurs Orgaan. Pa duna un ehempel Kamer van Koophandel di Hulanda ta traha den forma di un ZBO. Lo pone 3 Hulandes na Den Haag dirigi e entiteit aki y e entiteit aki tanto Aruba-Curacao-St Maarten lo mester bay deal cune pa tur cos y nan ta practikamente maneha presupuesto di tur e paisnan. Alaves e entiteit aki lo bin cu reformenan di Overheid Financien, Economia, Salud Publico, Enseñansa y Husticia. Pues no lo keda na Financia Publico solamente. Un punto importante elabora den e documento aki ta “Kosten en effectiviteit publieke sector”. Akiden ta para entre otro cu lo bin medidanan drastico riba rebaho di salario y versobering di arbeidsvoorwaarden pa trese e “public wage bill” den liña cu averahe den Caribe. Finalmente esaki lo significa tambe pa manda un X cantidad di hende cas. Gobierno di Aruba riba su mes a inicia diferente projectonan di reforma y ta consiente cu lo mester encamina e caminda di reformenan pa futuro. Ta berdad cu e punto aki mester atencion pero lo sa di hasie na un forma sostenibel unda tur stakeholders lo participa scapando pan di nos concuidadanonan. Laga nos ta diligente pa hunto nos saca Aruba for di su pior crisis cu nos ta pasando aden atraves di e efectonan di covid 19. Pues NO na Rijkswet aki.