Parlamentario Jennifer Arends-Reyes ta considera e Landsverordening Algemeen Investerings- en Ontwikkelingsfonds (AIOF) un instrumento importante pa permiti Aruba planifica y financia inversionnan strategico riba un periodo di varios aña. Segun Arends-Reyes, e propuesta di ley ta brinda e oportunidad pa crea mas continuidad den proyectonan cu ta esencial pa Aruba.
Durante e debate parlamentario, Arends-Reyes a señala cu actualmente tin aproximadamente 43 miyon florin aloca pa inversion, placa cu por uza pa move proyectonan importante dilanti na beneficio directo di comunidad. Un pais mester por yuda su capital humano y alavez inverti den diferente proyecto cu tambe ta na beneficio di comunidad.
“Demasiado biaha nos a mira proyecto necesario keda atrasa, para durante ehecucion of perde continuidad. Esaki no solamente causa frustracion den comunidad, sino tambe deterioro di infrastructura y destruccion di capital publico. Aruba no por sigui perde tempo ni oportunidadnan pa desaroyo,” Arends-Reyes a expresa.
Segun e parlamentario, e diferencia principal cu AIOF ta cu e placa destina pa inversion lo ta separa di gastonan regular di gobierno. E fondo lo funciona basa riba un agenda di inversion multianual, permitiendo cu proyecto no mester para automaticamente ora un aña presupuestario termina.
Arends-Reyes a splica cu e fondo por contribui na continuidad di inversionnan den infrastructura, sostenibilidad, innovacion, digitalisacion, fortalecemento economico y modernisacion di servicio publico.
“Aruba mester sali for di e ciclo caminda proyecto ta wordo anuncia, pero despues ta keda riba papel of ta para durante ehecucion. Cu AIOF nos tin e oportunidad pa traha cu preparacion tecnico, planificacion serio y continuidad,” el a declara.
Na mesun momento, Arends-Reyes a enfatisa cu Parlamento lo conserva plenamente su derecho presupuestario. E agenda di inversion y cada proyecto specifico mester wordo presenta y aproba mediante un presupuesto separa di AIOF cu mester pasa door di Parlamento.
Ademas, Minister di Finansa lo mester presenta cada seis luna un informe detaya tocante entrada y gastonan di e fondo. Gobierno tambe a confirma cu lo establece un plataforma publico digital caminda ciudadanonan por sigui e proyectonan, presupuesto y gastonan relaciona cu AIOF.
Como resultado di un nota di cambio presenta durante e tratamento di ley, tambe lo ta posibel pa fondonan proveniente di Hulanda y di proyectonan financia pa Union Europeo wordo incorpora den AIOF, ampliando asina e posibilidadnan pa inversion.
Arends-Reyes a destaca cu prome cu cualkier fondo wordo libera, gobierno mester presenta un lista concreto di proyectonan, cu informacion tocante costo, fecha di inicio y finalisacion, entidad responsabel pa ehecucion y e resultadonan cu comunidad por spera.
“Nos ta apoya inversion, pero cada florin mester produci resultado. E fondo mester ta transparente, controla y enfoca riba proyectonan cu ta cla pa cuminsa y cu ta aporta na calidad di bida, empleo y crecemento economico,” Arends-Reyes a declara.
Segun e parlamentario, e berdadero exito di AIOF no ta midi simplemente riba cuanto placa ta wordo deposita den e fondo, sino riba e capacidad pa entrega proyectonan concreto cu ta caba na tempo, dentro di presupuesto y cu un beneficio directo pa pueblo di Aruba.
“Pueblo kier mira miho caminda, mas oportunidad economico, servicio publico moderno y inversionnan cu ta haci un diferencia real den nan bida diario. Esaki ta e meta cu nos mester tene dilanti di nos,” Arends-Reyes a conclui.
Parlamentario Jennifer Arends-Reyes: “Tin 43 miyon florin aloca pa inversion pa construi Aruba di mañan”
