Mira ki bon y ki dushi ta pa rumannan biba hunto den harmonia.
Mayoria matrimonio riba e mundo aki a forma un famia, y semper a existi argumento den famia, sea ta pa un prueba pa nan crece mas den Señor, of hopi biaha desobedencia na Dios ta trece e argumento.
Pero Dios den su inmenso amor kier pa nos stima otro di henter nos curazon, no cu dos cara, tampoco cu dobbel animo, pero amor di berdad, cu ta bini solamente di Cristo Hesus.
Nos no tey como famia pa kibra otro, entre esposa y esposo no por existi competencia di ningun clase, pasobra nan dos ta yama pa stima otro, y asina duna testimonio di amor na nan yuinan, y pa e yuinan por pase over pa nan yuinan.
Dios a institui Matrimonio y Famia pa semper , pa asina homber y muher por sigi multiplica den e mundo aki y duna gloria na Dios.
Nos ta bibando den tempo trabahoso, esey tur hende sa, pesey awor mas cu nunca nos mester cuida e nucleo familiar, y nos tin di haci tur locual ta posibel, pa moral y respet tin bida largo den cada famia.
Pasobra Famia ta e pilar di social den cada pais,y matrimonio ta e base di moralidad pa cada hogar, pasobra esey ta boluntad di Dios.
Pesey laga nos cana cu tur humildad y suavidad, cu pasenshi soportando otro den amor.( Efesionan 4:2)
Awor mas cu nunca cu nos a realisa cuanto confusion tin na caminda, cuanto engaño ta haña sosten rond mundo, nos mester bira mas consciente kico nos kier di berdad pa nos famia.
Mayor si nunca bo no tabata vigila bo famia, awor bo tin di hacie of bo ta perde locual Dios a duna bo, pa falta di seriedad y negligencia.
No permiti bo hogar ta sin oracion, pasobra oracion mester ta e base di tur famia.
No permiti ningun pleito of discucion, rabia y falta di pordon crece den bo hogar, purba di tur manera di trece reconciliacion mas pronto cu ta posibel.
No bisa ta cos di mucha, pero den tur momento, para firme como mayor, y como esun cu ta trece pas den tur asunto.
Un yui sabi ta haci su tata contento,ma un yiu bobo ta un tristesa pa su mama.( Proverbionan 10:1).
Nos yuinan ta nos tesoro, y nos como mayor ta e heroe di nos yuinan, pesey nos mester mantene un balansa saludabel den famia, y no duna e enemigo entrada, den ningun forma. ( Juan 10:10).
Famia ta precioso den bista di Dios, y tin algo hopi netji cu Dios a haci ta cu nos tur ta bini for di un famia, no ta existi hende cu no tin famia, tur hende tin un mama y un tata.
Si no tin mama y tata no tin famia, e tata ta pone e simia, e mama ta e cargado, y Dios ta esun cu ta duna crecemento, asina un famia ta bini na existencia.
Dios kier bolbe e curason di e tatanan bek na e yuinan y e curason di e yuinan bek na e tatanan.(Malakias 4:5).
Ta hopi importante e relacion entre tata y yiu, mester ta un relacion solido y amistoso.
Un tata mester ta amigo di su yui pa asina dune e base di amor y respet cu e mester pa enfrenta bida.
Siña bo yiu pa haci locual cu ta bon, y pa bo por tin e confiansa den bo yiu, y asina bo yiu tambe realisa cu kico cu e por pasa den su bida, e por bolbe bek serca su tata.( Lucas 15:17).