E problema alarmante di sushi, dump nan ilegal y mal maneho di tereno na Aruba ta keda un reto grandi pa autoridadnan. PR. Voorlichter di Bureau City Inspector (BCI) Maikel Gomes a duna un bista cla riba e retonan diario cu e departamento ta enfrenta, e medidanan cu gobierno a tuma y e violacionnan continuo cu ta tuma luga rond nos isla door di nos propio ciudadanonan.
Un di e puntonan principal cu Gomes ta señala ta e echo cu, maske a haci varios esfuerso, e problema di sushi y dump nan ilegal ta keda persistente. Gobierno a introduci e yamada “zona di desperdicio” habri di 7’or di mainta te cu 3’or di atardi, unda ciudadano por tira sushi gratis. Sinembargo, hopi hende ta sigui ignora e facilidad aki y ta prefera di benta sushi rond e isla, convertiendo mondi y terenonan den dump nan clandestino.
Ley tin: Tereno propio no ta duna derecho pa haci un desaster Un mal entendido comun den comunidad ta cu si un persona ta doño di un tereno di propiedad (eigenom) of erfpacht, e tin derecho di uza esaki pa loke cu e ta desea. Gomes ta enfatisa cu esaki ta totalmente robes. Segun articulo 28 di e Algemene Politie Verordening), ta estrictamente prohibi pa transforma terenonan den tiramento di sushi of causa un desaster ambiental.
Ora cu inspector yega na un sitio pa trata un keho di sushi, nan ta enfrenta e reto cu hopi biaha ta tira e sushi anochi of marduga, ora cu e servicio no t’ey. Maske inspeccion tin poder pa duna boet den cierto situacion, ora cu trata di sancion mayor y determinacion di e suma exacto, e caso ta keda den man di Ministerio Publico (OM). Ademas, apesar di tin autoridad den colaboracion cu polis, e proceso di penalisacion ta depende di e tipo di violacion y e decision di OM.
E confusion riba terenonan coba y e rol di diferente departamento: E terenonan coba (uitgraving) pa saca santo. PR. Voorlichter di Bureau City Inspector (BCI) Maikel Gomes a splica cu ora un tereno ta wordo coba, e caso ta cay directamente bou di direccion di Dienst Natuur en Milieu (DNM) y ta sali completamente for di man di City Inspector. Al fin y cabo, e maneho di tereno, sea cu ta propiedad, erfpacht, of pa planta, ta keda bou di Directie Infrastructuur en Planologie (DIP).
Bureau City Inspector (BCI) ta fungi como un punto di entrada pa hopi keho via e sistema di FIXI, departamentonan competente manera DIP, DOW, KPA of DNM. Sinembargo, Gomes ta subraya cu despues cu un caso ta wordo traspasa na un otro instituto, e responsabilidad di cumpli y duna resultado ta keda den man di e instancia concerni.
PR. Voorlichter di Bureau City Inspector (BCI) Maikel Gomes ta haci un apelacion fuerte na sano huicio di henter pueblo di Aruba. Pa corda cu Aruba ta nos cas, y e echo cu bo ta doño di un tereno no ta duna ningun ciudadano e derecho pa destrui medio ambiente. Ta exigi un colaboracion mas stricto di parti di tanto publico como tur departamento gubernamental (DNM, DIP, DOW, KPA) pa hunto cumpli cu nan deber y conserva nos isla limpi. Solamente hunto nos por logra tin un Aruba mas limpi.