Edishon di Verano
Tourism Corporation Bonaire (TCB), den kolaborashon ku Curoil riba djasabra 8 di ougùstùs 2026 eksitosamente a organisá su di tres evento di Taste of Bonaire di e aña akí den Isidel Beach Park.
E edishon di Verano akí ku a tuma lugá for di 18.00 or te 22.00 or, a trese nos habitantenan i nos bishitantenan huntu pa un anochi yen di dushi kuminda, entretenementu i sentido komunitario. E evento tabatin un ambiente vibrante di verano, ku hendenan ku a bende kuminda ofresiendo un variedat sabroso di platonan lokal i internashonal.
E wéspetnan a disfrutá di presentashonnan live di Ocean Band i Steelband Silver Bullet, miéntras ku DJ Marv durante henter anochi a sòru pa un ambiente yen di alegria ku un selekshon eksitante di músika. Un di e puntonan kulminante di e anochi tabata presensia di diferente figura di Disney World, ku a deleitá e muchanan i famianan, pa medio di tene interakshon i saka potrèt ku nan, i asina a krea momentunan inolvidabel pa tur hende presente.
TCB ta ekspresá su sinsero gratitut na Curoil pa nan sosten kontinuo komo spònser di e evento, i tambe na tur bendedó, artistá, partner i boluntario ku a partisipá i na tur hende ku tabata presente i a kontribuí na un biaha mas un edishon eksitoso di Taste of Bonaire.
TCB ta sigui komprometé su mes pa organisá eventonan ku ta selebra e kultura kulinario riku di Boneiru, ku ta fortifiká enbolbimentu di nos komunidat i ku ta brinda eksperensianan inolvidabel na tantu nos habitantenan komo nos bishitantenan.
