Featured Local

Wardakosta ta interseptá di kuater, di sinku i di seis transporte di droga dentro di tres siman


Siman pasá djamars i djárason un boto di patruya Metal Shark di e punto di sosten di Wardakosta
na Aruba, den kolaborashon ku unidatnan di avionnan di Wardakosta, a detené dos boto, durante
kua un total di kasi 500 kg kontrabanda a keda konfiská. Dos Kolombiano, un Venezolano, i dos
Arubiano a keda detené den e kaso aki. E droga i e sospechosonan a keda entregá na e ‘Unidat
kontra Krimen Organisa’ di Kuerpo Polisial di Aruba, ku ta sigui ku investigashon di e kasonan.
Ayera Zr.Ms. Groningen, kual ta nabegando pa Wardakosta Karibe Hulandes, a bolbe intereseptá
un transporte di droga. Esaki a keda hasí pa medio di kordinashon di e Sentro di Operashon
Marítimo (MOC) en koperashon ku e helikòpter i avion di Wardakosta. Durante e akshon aki mas
ku 1000 kg di kontrabanda a keda konfiská i a detené sinku Venezolano. E kontrabanda i e
sospechosonan a keda entregá na Kuerpo Polisial Kòrsou, ku lo sigui ku sobrá investigashon.
Ku e último akshon akí, e konteo di e kasonan di Wardakosta a yega na seis den un lapso di tres
siman. E total kantidat di peso di e kontrabanda ku a konfiská durante e seis akshonnan aki ta
yega na kasi 4000 kilo. E lucha kontra trafikashon di droga ta sosedé den bon koperashon ku
Wardakosta su partnernan lokal klave den e kadena hudisial, manera e diferente kuerponan
polisial di Kòrsou i Aruba, BOT K-9 di KIA, Guarda nos Costa, Douana i Servisionan di
Imigrashon.

Related posts

Fin di siman ta cera cu 133 caso di covid-19

EA News Author

Corte di Prome Instancia 16 juni 2022

EA News Author

Erik van Veenendaal di Hulanda rekonosé komo e promé Embahador di aña 2022

EA News Author

Leave a Comment