Un di e mentiranan cu ta circula den e campaña di eleccion Parlamentario ta esun cu ta Prome Minister Evelyn Wever Croes a duna instruccion pa corta 60 miyon florin den sector di cuido aki na Aruba.
Esaki e lider di MEP ta rechasa completamente. Y esaki ta algo cu Parlamentario endy Croes y otronan a señala tambe den diferente declaracion.
Recientemente a publica copia di un carta cu Secretario di Estado Raymond Knops a manda pa Prome Minister di Aruba mr. Evelyn Wever Croes. E tabata un reaccion riba un carta manda dia 10 di maart ultimo door di prome minister na Raymond Knops reclamando e presion cu Madre Patria ta pone riba Aruba, den un situacion di pandemia.
MEP na diferente ocasion a bisa cu e prome mandatario ta bringando tur dia e decision inhusto di Hulanda den e asunto di cortamento di 5 miyon florin pa luna den gastonan di AZV.
Den e carta manda na luna di maart, un biaha mas a mustra Hulanda cu CAFT durante un reunion un siman prome cu a traha e carta aki ainda tabatin con pa yega na 5 miyon pa luna y ta sconde nan tres di e decision Rijksministerraad.
A mustra Hulanda cu inclusive IMF recien den nan Artikel IV consultatie a cuestiona e corte di 5 miyon pa luna den un Pandemia y a splica cu esaki ta empeora e “human and economic toll of Covid 19”. Pues por tuma nota cu Minister President ta bringando cu Hulanda keto bay pa pueblo. Si gana e bataya aki pueblo lo sali beneficia.
Inclusive den e carta por lesa cu prome minister ta papia caba di un comision di cual lo por ta e miho alternativa. Si ta papia di un alternativa, e ta mustra cu Aruba, ni gobierno, ta esun cu a bini cu e proposicion pa corte 60 miyon florin den gastonan di AZV.
