Derrel Lampe, Mister Aruba Supranational 2021 desde Februari ta den preparacion extenso pa representa Aruba pa prome biaha na e certamen masculino Mister Supranational 2021 cu lo tuma lugar na Poland di 12 pa 22 di Augustus 2021.
Derrel su tarea principal como Mister Aruba Supranational ta pa promociona Aruba riba un plataforma internacional cu alrededor di 40 pais participando y cu un audiencia rond mundo.
Derrel, un hoben di 29 aña, ta un persona cu ta convenci cu empatia ta e yabi pa trese union den tur situacion: “Door di mustra empatia nos por laga e otro persona sinti cu por pone nos mes den su sapato pa compronde tur situacion mihor y sin huzga. Esaki lo ta mi mensahe cu mi lo hiba cu mi na Poland ora cu mi papia tocante mi mes y mi isla,” asina Derrel a expresa.
Derrel a ricibi guia pa su apariencia físico y tambe a enfoca riba loke e certamen masculino ta busca, un persona cu aspiracion y cu por inspira otro persona.
Ya caba por LIKE e Facebook page “Mister Supranational” y/of e Instagram page “officialmistersupranational” pa mustra apoyo pa ARUBA na momento cu e competencia cuminsa otro siman.
Keda pendiente pa cobertura di Derrel su participacion na Poland cu lo cuminsa diaranson 11 di Augustus ora cu Derrel sali rumbo pa Poland pa representa Aruba na Mister Supranational 2021.
