Fundacion Orguyo Aruba a tuma nota di algun video cu ta pasa rond, cu ta illustra mal comportacion di algun turista cu a bin Aruba riba barco crusero den siman. Orguyo ta condena y distancia di tur comportacion cu ta contra leynan penal di Aruba. Como tal ta lamenta e sucedido cu algun di e turistanan di e barco crusero a causa. E comportacion di algun no ta refleha e normanan di e gran mayoria den e comunidad LGBTQI+.
Condenabel tambe, ta e mal uso di algun persona y organisacionan, pa usa mal comportacion di algun, pa demonisa henter e comunidad LGBTQI+. Nos sa cu den tur parti di nos sociedad actonan castigabel ta tuma lugar, y cu e personanan cu comete esakinan mester carga e consecuencia cu esaki ta trese cu n’e. Esaki ta conta igual pa hetero, LGBTQI+, rasa, religion. afiliacion politico y tur otro denominacion cu por ta existi. No por usa actuacion di algun, pa trece tur hende cu ta pertenece na un denominacion den luz negativo.
Ta lamentabel cu mal comportacion di algun ta wordo usa pa sigui fomenta odio contra di e comunidad LGBTQI+. Homofobia, stigma y discriminacion contra personanan LGBTQI+ por afecta e salud y bienestar di e comunidad aki negativamente.
Pa e motibo aki, na lugar di fomenta odio contra un parti di nos sociedad, ban traha riba un Aruba inclusivo na unda tur hende por biba den harmonia cu otro y por yega na desaroya na nan mayor potencialnan.