Riba djamars 17 di yüni e grupo di proyekto Mesa di Klima a kuminsá ofisialmente ku e promé seri di kòmbersashon di mesa di klima den bario. E promé kòmbersashon a tuma lugá na Sentro di Bario Amboina i e tabata intenshoná pa habitantenan di Tera Kòrá i bisindario. Aunke e kantidat di hende ku a bini tabata limitá, a surgi un diskushon balioso i profundo. A kompartí entre otro kon klima tabata ántes, importansia di dam bon diseñá i solushonnan pa hende mes fangu awa di yobida na nan propio kas. E seshon tabata bou di guia di señor Nolly Oleana, presidente di e grupo di proyekto.
Riba djárason 18 di yüni un mesa di klima spesial a tuma lugá pa hóbennan. Alumnonan di grupo 7 i 8 di e skolnan básiko De Pelikaan, Rayo di Solo, Kolegio San Luis Bertran Rincon, Het Koraal i studiantenan di Liseo a bai den kòmbersashon ku e grupo di proyekto tokante kambio di klima na Boneiru. Esaki a bira un enkuentro inspirativo kaminda hóbennan a partisipá aktivamente i a kompartí nan preokupashonnan.
Un punto importante ku nan a menshoná vários biaha, ta ku masha tiki biaha ta papia tokante kambio di klima na kas, miéntras ku e tópiko ta afektá nos tur. Tambe e hóbennan a indiká ku segun nan, muchu tiki kos ta keda hasí pa realmente prepará Boneiru pa kambio di klima.
Dia 19 di yüni e siguiente seshon a tuma lugá na Playa. Na kaminda pa e kòmbersashonnan akí, den tur e barionan ku ta partisipá, a parti foyeto di informashon ku kolaborashon di e polisnan di bario i e lidernan di bario.
Bo no a partisipá ainda? Bo ta kordialmente bon biní!
Den e simannan binidero ta sigui mas kòmbersashon di mesa di klima. Ainda bo por djòin nos. Wak e fechanan i sitionan menshoná akí bou:
• 24 di yüni – Sentro di Bario Nikiboko
• 3 di yüli – Sociedad San Antonio de Padua Rincon
• 8 di yüli – Sentro di Bario Nort Salina
• 9 di yüli – Club Avanti
• 14 di yüli – Sentro di Bario Amboina
Pasa un ratu, partisipá na e kòmbersashon i yuda pensa tokante un Boneiru habitabel. Huntu nos ta hasi e diferensia. Nos isla, nos responsabilidat.
