Aktualmente Direktorado di Planifikashon i Desaroyo ta trahando duru ku trabou di mantenshon na diferente sitio na nos isla. Tur kaminda na Boneiru tin kapplug ta traha pa tene nos kamindanan i e parti kantu di e kamindanan akí, nos espasionan públiko i nos plenchinan limpi i seif.
E kapplugnan ta kita tur brasa di palu ku ta kologá riba kaminda i nan ta kòrta yerba haltu i otro vegetashon ku ta stroba bista riba kaminda òf ku por kousa peliger pa tráfiko i siguridat. Ta trata di un ròndu importante di mantenshon pa siguridat di usuarionan di kaminda i peatonnan, i pa evitá molèster durante temporada di áwaseru.
E trabounan ta tuma lugá den diferente fase, di manera ku henter nos isla ta bini na turno. Na e momentu akí nan ta trahando den e siguiente barionan:
• Playa
• Nikiboko
• Tera Kòrá
• Amboina
• Kaminda Lagun
• Nawati i Nort’i Saliña
• Kaminda di Turista i Karpata
• Republiek
Nos ta supliká usuarionan di kaminda pa tene kuenta ku seramentu temporal di kaminda òf ku vehíkulonan ku ta kore pokopoko. Tambe nos ta pidi tur hende pa paga bon tinu riba bòrchinan di atvertensia kantu di kaminda, ku ta indiká na unda e kapplugnan ta traha. Di e manera akí nos hendenan por hasi nan trabou na un manera seif.
Direktorado di Planifikashon i Desaroyo ta gradisí nos habitantenan i bishitantenan pa nan komprenshon i koperashon.
