Tourism Corporation Bonaire (TCB) ta hopi kontentu di por anunsiá lansamentu di e ‘Capture Bonaire Photo Contest 2025’, un selebrashon anual di bunitesa, kultura i alma di nos isla pa medio di fotografia. E tema di e aña akí, Rediscover Bonaire – Deskubrí Boneiru di nobo, ta invitá tantu nos poblashon lokal komo nos bishitantenan pa eksplorá nos isla ku un bista kreativo i kapturá perspektivanan nobo, pèrlanan skondí i momentunan úniko ku ta revelá Boneiru den un lus diferente.
E kompetensia ta dura for di 5 di sèptèmber te ku 26 di sèptèmber 2025 i e ta enkurashá tur partisipante pa wak mas leu ku loke ta konosí kaba, i mustra imágennan ku ta resaltá eksperensianan inesperá, sea ku ta trata di e sensashon na momentu ku bo deskubrí un bahia bírgen, e elegansia trankil i ketu di e flora i founa di nos isla, òf e alegria di konektá di nobo ku Boneiru su hendenan i su tradishonnan. E kompetensia di e aña akí ta bai tokante rebibá kuriosidat, inspirá eksplorashon i rekòrdá mundu ku Boneiru semper tin algu mas pa ofresé.
Kon pa partisipá
E kompetensia ta invitá tur partisipante di 18 aña bai ariba pa manda nan potrètnan via www.bonaireisland.com/photo-contest/. Ta husga e potrètnan pa loke ta trata kreatividat, komposishon i e abilidat pa revelá Boneiru na un manera nobo i inspirativo. Tantu fotógrafo amatùr komo fotógrafo profeshonal por manda potrèt.
Premio i anunsio di ganadó
E kompetensia ta dura kuater siman i dia 30 di sèptèmber 2025 ta anunsiá e ganadónan. E premionan pa e mihó tres potrètnan ta:
Promé premio: Estadia pa dos na Divi Flamingo Beach Resort
Di dos premio: Sena pa dos na Seaside Krioyo Fusion
Di tres premio: Landsailing pa dos na Bonaire Landsailing Adventures
Ta publiká e potrètnan partisipante riba e plataformanan ofisial di TCB, entre otro riba www.bonaireisland.com, i TCB por usa nan den futuro kampañanan di merkadeo pa promové Boneiru su enkanto i outentisidat.
E aña akí ‘Rediscover Bonaire – Deskubrí Boneiru di nobo’ ta mas ku solamente un tema pa un kompetensia: e ta un yamada pa akshon. Sea ku bo ta biba henter bo bida akinan kaba òf ta pa promé biaha bo ta bishitá nos isla, semper tin un parti nobo di Boneiru pa deskubrí. E kompetensia tin komo meta pa inspirá hende pa buska aventura, deskubrí kos nobo i kompartí e magia eterno di nos isla for di un perspektiva renobá.
Pa e reglanan kompleto di kompetensia i e kondishonnan, bai riba www.bonaireisland.com/photo-contest/.