E siman aki, emtre 16 pa 19 di october 2025, a tuma luga e di 81 Asamblea General di Sociedad Interamericana de Prensa (SIP) na Punta Cana, na República Dominicana. E reunion a marca e inicio di cuater dia di debate, reflexion y proposicionnan riba futuro di periodismo den henter e continente Americano.
E reunion a trece hunto redactornan, periodistanan y ehecutivonan di medionan di comunicacion di henter e continente pa refleha riba e retonan grandi cu periodismo contemporaneo ta enfrenta, cu atencion spescial na libertad di prensa, sostenibilidad di medionan di comunicacion y e impacto di inteligencia artificial riba e profesion.
Mester menciona cu durante e asamblea a aproba e miembresia di E Arubiano News eanews.com di Aruba, dirigi pa Farrah Boekhoudt. E media netamente Rubiano, funda na aña 2018 awo ta figura banda di Diario, Bon Dia Aruba y Headlines Group (24ora.com y Trempan.com) como miembro activo.
E ceremonia di apertura dia 16 di october a conta cu participacion di e Presidente di República Dominicana, Luis Abinader y e Secretario General Asistente di Organisacion di Estadonan Mericano (OEA), Laura Gil, hunto cu e Presidente di SIP, José Roberto Dutriz, Director General y CEO di La Prensafica Gráfica di El Salvador.
E evento a tuma luga na The Westin Punta Cana Resort & Club, e sede oficial di e Asamblea.
Durante cuater dia a presenta y discuti informenan riba e estado di libertad di prensa den 24 pais den region, hunto cu panelnan y tayernan riba innovacion, transformacion digital, modelonan di negoshi, y e rol di prensa den democracia.
Manera ta tradicion, e Asamblea a conclui cu e presentacion di e Premionan SIP pa Excelencia Periodístico 2025 y e reconocementonan institucional:
- Premio Grandi di Chapultepec: Fundacion Thomson Reuters.
- Gran Premio pa Libertad di Prensa: Daniel Coronell, presidente di Univisión Noticias.
- Gran Amigo di Prensa: Redacciones5G.
- Ehecutivo di Aña: René Picado Cozza, presidente di Teletica, Costa Rica.
E organisacion “Inter American Press Association” of na Spaño yama “Sociedad Inter Americana de Prensa” ta existi desde aña 1943 y ta representa mas di 1300 miembro, mayoria medionan di comunicacion den Norte America, Centro America, Sur America y Caribe. Su oficina principal ta situa na Miami. EAnews lo sigui desaroya y sigui cu su profecionalismo y keda haci un diferencia den medio na Aruba.
