Den un komunikado sr Carlos López Natera, na
nòmber di Movementu 21 (M21) ta felisitá tur hende muhé riba nan dia. Sr
López Natera: “Kordialmente nos ta ekspresá nos mas sinsero felisitashon na
tur hende muhé riba nan dia, spesialmente na tur hende muhé di Boneiru. E
muhénan boneriano ta forma un pilar fundamental di nos komunidat. Ku nan
trabou, nan sabiduria, nan amor pa famia i nan kompromiso ku nos komunidat,
nan ta kontribuí tur dia na edifikashon di un Boneiru mas fuerte, mas hustu i
mas solidario. Na kas, na trabou, den negoshi, den edukashon i den liderazgo,
nos hende muhénan ta mustra klaramente ku sin nan, no por tin progreso real
pa nos isla.
Lucha pa mas partisipashon di hende muhé
Kontinuando sr Carlos López Natera ta trese dilanti ku nos mester rekonosé tambe
ku ainda tin desafionan real: “Na e momentunan akí hopi hende muhé ta enfrentá
desigualdat den oportunidat, den posishon di liderazgo i den partisipashon na
momentu di tuma desishonnan importante pa nos komunidat. Un komunidat
moderno i hustu no por permití ku talento, inteligensia i kapasidat di nos hende
muhénan ta keda limitá. Pa M21, e lucha pa mas rèspèt, mas oportunidat i mas
representashon pa nos hende muhénan no ta solamente un asuntu simbóliko di un
solo dia, sino un prioridat sosial i polítiko. Nos ta kere firmemente ku Boneiru mester
garantisá espasio real pa partisipashon di hende muhé.”
Boneiru mester di hende muhé pa progresá
López Natera ta konkluí ku e siguiente mensahe: “For di M21 nos ta ekspresá nos
profundo agradesimentu pa tur loke nos hende muhénan ta hasi pa nos komunidat, i
nos ta reafirmá nos kompromiso di trabou pa un komunidat kaminda igualdat di
oportunidat ta un realidat, i no solamente un aspirashon. Riba Dia Internashonal di
Hende Muhé, nos ta manda un mensahe kla: Boneiru tin mester di e forsa, e vishon i
liderazgo di su hende muhénan pa por sigui progresá. Felis Dia Internashonal di
Hende Muhé!”