Sindicatonan ta pone en duda e viabilidad di e clausulanan di salida inclui den e propuesta Rijkswet HOFA. Segun sindicatonan, aunke riba papel e provisionnan ta parce atractivo, den practica nan no ta realistico pa Aruba por cumpli.
Presidente di sindicato FTA, Jose Figaroa, a indica cu e condicionnan establece pa un eventual salida di Aruba for di e Rijkswet ta demasiado estricto. El a enfatisa cu, segun su analisis, lo ta practicamente imposibel pa e pais yega na e nivel rekeri pa por sali for di e marco legal.
Figaroa a mustra cu e posicion di sindicatonan Uni ta basa riba e principio fundamental di autodeterminacion di pueblo. Segun Figaroa, ningun acuerdo of ley no mester limita e derecho di un pais pa determina su propio rumbo.
Ademas, sindicatonan a aclara cu nan no ta contra supervision financiero en si. Sinembargo, nan ta insisti cu cualkier forma di supervision mester respeta e limitenan di autonomia y autodeterminacion di Aruba.
E declaracionnan aki ta agrega mas tension na e discusion actual riba Rijkswet HOFA, un tema cu ta genera amplio debate den sociedad Arubiano tocante ekilibrio entre control financiero y independencia nacional.