EA news ta sigui e desaroyo di Rijkswet HOFA di cerca, pero tambe e movecionnan politico cu ta andando, faltando respet pa e pueblo di Aruba. E gobierno di AVP-FUTURO no kier duna claridad ni informacion na pueblo di Aruba, pakico nan ta tumando e posicion di kita autonomía, pa un paar di miyon di florin cu Hulanda a ofrece na presta Aruba na interes abou pa asina Aruba keda pa semper bou comando di Hulanda. Loke e gobierno di Aruba ta haci, den bista di hopi hende ta nada mas un show pa sconde e maldad cu nan ta cometiendo contra pais Aruba y mustra cu cos ta bon. E falta di consensus ta hopi cla, mientras cu gobierno ta negociando tras di cortina cu Hulanda riba e poco placa cu HOFA ta ofrece, y kico ta e benefishinan cu ta wordo negocia rond di e misterio over di e terenonan di refineria. Tur esaki ta treciendo desconfianza den e gobierno aki.
Normalmente den un democracia sano, e mandatario ta un sirbi e pueblo, tuma decisionnan y lucha pa e bienestar di e pueblo. Lamentablemente loke cu e gobierno su actitud ta refleha, ta totalmente opuesto. Particularmente bou di e maneho di Minister di Desaroyo Económico, Geoffrey Wever ta parce di ta bayendo den un direccion cu e pueblo no ta desea. E sentimento den comunidad cada dia ta mustra un desaprobación di e gobierno AVP-FUTURO, unda e pueblo ta sinti su mes defrauda y su voz ta wordo trapa, mientras e gobierno ta mustra ta determina, sin respet pa e pueblo ta tumando decisionnan crucial trapando riba e democracia, sin tene cuenta cu no tin consensus pa sigui cu e ley di HOFA. Tras di porta cera ta traicionando e pueblo di Aruba. Despues cu líder di partido AVP den campaña a bisa NO categórico contra HOFA, awe ta dobla pa partido FUTURO, basta e keda na mando.
E punto mas crítico ta e continuo acercamento y negociacion cu Hulanda pa logra e ley di HOFA (Aruba Financieel Toezicht) cu tur e condicionan cu no ta na fabor di Aruba. E comunidad di Aruba, a traves di diferente canal y den un forma bastante cla, a duna un señal di NO na e condicionnan aki cu ta compromete nos autonomia.
Apesar di e rechaso aki, e mandatarionan encabesa pa Geoffrey Wever ta parce di ta ignora e voz di pueblo. E insistencia pa sigui negosha cu Hulanda sin un mandato biniendo di e base, no solamente ta un falta di respet pa e boluntad popular, sino cu e ta lanta e pregunta: Pa ken e mandatarionan aki ta traha realmente? Pa e bienestar di Aruba, of pa cumpli cu un agenda imponi for di exterior?
E misterio di e terenonan di Refinería: Kico ta e compromiso?
Un otro topico cu tin e comunidad den duda y preocupacion ta e destino di e terenonan di e refinería. Esaki ta un di e recursonan di tereno y infrastructura di mas grandi y valioso cu Aruba tin. No obstante, te cu dia de awe, tin un falta total di informacion gubernamental:
Kico e compromisonan legal y económico cu e ministerio ta bayendo aden ta encerá?
Ken ta e socionan comercial tras di e movecionnan aki?
Pakico no tin un presentacion público y transparente structural pa e pueblo cu a vota pa e mandatarionan aki?
Haci negoshi (business) usando política como un escudo pa tuma decisionnan sin infoma e comunidad cu ta mira e actitud aki como un traicion directo na e confiansa di e votador.
“Ora un minister ta compromete e tera y e futuro financiero di un pais sin duna cuenta structural, e ta stop di ta un representante digno di pueblo y ta bira un manager di su propio interesnan.”
E pueblo ta yamando e gobierno pa e wordo scucha.
Aruba no por sigui wordo goberná a base di decisionnan unilateral. Decisionnan sin consenso, caminda e mandatarionan ta scoge pa asumi un actitud di superioridad den cual nan “sa mas miho cu e pueblo,” ta debilitá nos fundeshi democrático.
E pueblo di Aruba no a vota pa minister Wever, ni pa ningun otro mandatario, pa nan sinta negoshá e futuro di nos dushi baranca na fiansa of den secreto. Ta ora pa exigi transparencia total. Ta ora pa stop e movecionnan aki cu ta debilitá nos posicion y pa corda e mandatarionan cu e poder real ta bini for di pueblo, y cu na e pueblo so nan tin cu rindi cuenta.