Siman pasa, Biblioteca Nacional Aruba (BNA) a wordo honrá cu un bunita reconocimento pa su proyecto exitoso ‘Conta Cuenta na Cas di nos Grandinan’. E logro aki ta bini net na e momento cu e proyecto ta celebrando dos decada di existencia, cubriendo e periodo di 2006 pa 2026.
E proyecto, cu ta cay bou di e departamento di servicio na ‘Nos Grandinan’, tin como meta principal pa hiba alegria, literatura y un momento di Compania significante pa e adultonan mayor cu ta biba den casnan di cuido rond di e isla. A traves di relato y cuentanan cu ta lanta nostalgia, e iniciativa aki a demostrá di ta un pilá fundamental pa e bienestar emocional di nos grandinan.
Un esfuerso colectivo cu a rindi fruto
E reconocimento aki no ta un logro di un sola persona, sino e resultado di un trabou den ekipo locual Biblioteca Nacional Aruba a enfatisá y gradicí firmemente. Exito di e añanan largo aki ta danki na:
E Comision Organisadó: Cu pa 20 aña a percurá pa e logistica y seleccion di e miho cuentanan.
Media Team: Encargá cu e difusion y pa duna visibilidad na e bunita echosnan aki.
Sponsors y Aliados: Kendenan a kere den e vision y a brinda e sosten financiero y material necesario.
Voluntario y Colaboradornan: Tur esnan cu, de un forma u otro, a duna nan granito di arena pa mantene e proyecto bibo.
“E premio aki ta un testimonio di locual nos por logra ora un comunidad uni pa duna amor y atencion na nos grandinan. Biblioteca Nacional Aruba ta gradicí cordialmente cada persona y compania cu a contribui na e proyecto aki pa añanan largo,” e portavoz a expresa.
Sosteniendo nos cultura y herencia
Cu e proyecto ‘Conta Cuenta na Cas di nos Grandinan’, BNA no solamente ta combati e soledad cu hopi biaha ta afecta nos adultonan mayor, sino tambe ta mantene e tradicion oral di Aruba bibo. Pa medio di e cuentanan aki, ta rebibá recuerdonan balioso y ta reafirmá e balor y respet cu nos grandinan merece den nos sociedad.
Biblioteca Nacional Aruba ta reafirmá su compromiso pa sigui cu e noble causa aki, sperando di por sigui conta cu e mesun sosten pa hopi aña mas. Masha Pabien na BNA y henter e ekipo cu e reconocimento merecí aki!
