Tourism Corporation Bonaire (TCB) ta kontentu di por rekonosé diferente miembro di komunidat boneriano komo Bonaire Friends pa mart i aprel 2026, komo muestra di apresio pa nan kompashon, hospitalidat, profeshonalidat i impakto positivo riba bishitantenan di nos isla.
Pa luna di mart, TCB a rekonosé Pastor Marc, Dianne Pourier i René Sedney, ku huntu ku un rishèrshi lokal, a brinda sosten i kuido eksepshonal na un bishitante ku tabata pasando den un situashon difísil. Ku nan aktuashon nan a reflehá e kalor, e empatia i e sentido komunitario fuerte ku Boneiru ta konosí p’é.
E nominashon pa luna di mart no a destaká solamente profeshonalidat di esnan enbolbí, pero tambe e humanidat, e kompashon i e sosten sinsero ku habitantenan di Boneiru a mustra den e dianan despues di un suseso trágiko. Nan amabilidat i kuido a ofresé konsuelo den un periodo di pèrdida i a laga un impreshon signifikativo i permanente atras serka e bishitante en kestion.
Pa luna di aprel, TCB ta orguyoso di por honra Ralph ‘Moogie’ Stewart, ku e bishitante Nancy Louth for di Merka a proponé, pa motibu di su dedikashon di hopi aña largu pa krea eksperensianan inolvidabel pa tantu nos bishitantenan komo nos habitantenan lokal.
Segun e nominashon, pa medio di su aktuashon live i su interakshon kaluroso ku nos bishitantenan, den transkurso di hopi aña Moogie a krese i bira un di e personalidatnan di mas rekonosibel i hospitalario di Boneiru. Su músika, su energia i su aserkamentu personal ta kontribuí na un esfera festivo di hospitalidat, kaminda nos bishitantenan ta sinti nan mes na kas i konektá ku ambiente di nos isla.
Banda di su kapasidat pa entretené nos bishitantenan, Nancy Louth a elogiá Moogie tambe pa su kompromiso kontinuo pa konservá i honra kultura, historia i patrimonio ekológiko di Boneiru, inkluyendo su enbolbimentu ku aktividatnan relashoná ku herensia di Captain Don Stewart.
“E eksperensianan ku nos bishitantenan ta keda kòrda mas tantu, hopi biaha ta danki na e hendenan ku nan ta topa. Ku Bonaire Friends nos ta rekonosé i selebrá nos hendenan, ku nan amabilidat, hospitalidat i dedikashon ta laga un impreshon permanente atras serka nos bishitantenan, miéntras nan ta reflehá e kalor ku ta hasi Boneiru berdaderamente spesial. Nan aktonan ta kòrda nos ku finalmente turismo ta drai rònt di hende i e lasonan signifikativo ku nan ta krea”, segun Elesiër Angel, direktor di TCB.
Pa medio di e inisiativa di Bonaire Friends nos ta invitá bishitantenan pa kompartí nan storianan positivo tokante nos habitantenan lokal ku tabatin un impakto signifikativo durante nan estadia na nos isla. Tur luna nos ta destaká e hendenan ku a kontribuí na eksperensianan outéntiko i inolvidabel, ku ta reflehá e karakter i hospitalidat úniko di nos isla.
TCB ke gradisí e Bonaire Friends ku den e dos lunanan akí a haña rekonosementu pa nan amabilidat, dedikashon i representashon positivo di Boneiru. Nan kompromiso ta sigui laga un impreshon permanente atras serka nos bishitantenan i ta kontribuí na hasi Boneiru un destinashon berdaderamente spesial. TCB ta spera pa durante henter e aña akí pone mas héroe lokal den spòtlait.
Nos ta enkurashá nos bishitantenan pa sigui kompartí nan storianan positivo via www.bonaireisland.com.
