Fraccion di PPA a kibra e barera
Den un iniciativa cu poco biaha ta mira den politica Arubano, Fraccion di PPA a manda un invitacion formal na tur lider di fraccion den Parlamento y na e gremionan comercial principal di Aruba pa reuni den un solo espacio y comparti informacion cu pueblo riba HOFA y LWHO.
Segun parlamentario Eduard Pieters, e momento a yega pa Aruba pone interes di pais prome.
“Nos no por sigui discuti un tema di e magnitud aki den diferente espacio. Si HOFA y LWHO lo tin impacto riba futuro financiero y autonomia di Aruba, e informacion mester ta comparti den un forma habri y transparente cu pueblo,” Pieters a declara.
P’esey PPA a invita tur lider politico representa den Parlamento pa participa y comparti nan vision y posicion riba e dos leynan aki. Na mes momento, a manda invitacion tambe na e gremionan comercial principal, incluyendo CUA, ATIA, AFBA, AHATA, KvK y SNBA.
Pa PPA, e tema aki a pasa frontera di partido politico caba. E meta no ta crea confrontacion, sino pa comparti informacion obhetivamente. E anochi aki ta pa Aruba por scucha directamente for di e lidernan politico y representante di e sector comercial, haci pregunta y forma su propio conclusion basa riba echo y argumento.
PPA ta expresa cu e invitacion aki ta habri pa tur lider di fraccion y tur gremio comercial, pasobra e decisionnan cu por afecta futuro di Aruba no mester ta discuti den aislamento.
“Independientemente di color politico, Aruba ta di nos tur. Y e pueblo merece tende tur posicion prome cu Parlamento tuma e decisionnan definitivo,” Pieters a enfatisa.
E encuentro lo tuma lugar dia 16 di juni 2026 na SIMAR, Sabana Blanco 36, for di 6:30 te 8:30 di anochi, cu señora Shirley Eisden como moderador independiente.
Mas cu un evento pa debati, e ta un yamada pa dialogo nacional, participacion y transparencia. Pasobra ora ta trata di futuro di Aruba, informacion no mester separa nos; informacion mester uni nos.
