Segun lider di fraccion di PPA, Eduard Pieters, Aruba ta atravesando un momento decisivo, unda e pais mester liderazgo, informacion y e decisionnan serio. Sinembargo, hopi biaha e debate politico ta bira un intercambio di declaracion y debate riba Facebook y den e medionan social, en bes di un discusion profundo riba e solucionnan pa e gran retonan nacional.
“Pueblo no ta buscando mas ‘influencers’ politico. Pueblo ta buscando informacion. Pueblo kier compronde loke ta pasando y con e decisionnan cu gobierno ta tuma lo afecta nan futuro.”
Pieters a enfatisa cu topiconan manera Ley di Reino HOFA, salud, siguridad, enseñansa y desaroyo economico no por ta trata como un campaña politico permanente y solamente riba Facebook.
“Esakinan ta decisionnan cu lo determina e futuro di Aruba. Esakinan merece debate serio, argumento serio y informacion obhetivo.”
Segun e parlamentario, e rol di un representante di pueblo no ta pa fomenta polarisacion, sino pa crea espacio pa dialogo, analisa diferente punto di bista y presenta e mihor solucionnan.
“Politica no mester bira un competencia di ken por grita mas duro of ta mas popular riba medio social. Politica mester bira e lugar unda idea, argumento y vision pa bienestar general ta gana.”
Pieters a conclui cu PPA lo sigui insisti riba informacion, transparencia y dialogo, pasobra solamente cu un pueblo bon informa, Aruba por tuma e decisionnan responsabel tocante su futuro. “Un democracia fuerte no ta construi cu slogan. E ta construi cu informacion, dialogo y liderazgo.”