Na Aruba tin polis, dokter, psicologo, profesional di salud, fundacion y boluntario cu diariamente ta traha pa salba bida. Pero segun parlamentario Eduard Pieters, nan no por sigui haci e trabou nan so, sin tin participacion y involucracion primordial di gobierno.
E lider di fraccion di PPA a pone e reflector riba e hendenan cu ta den e prome liña di e lucha contra adiccion, mientras Gobierno mes ta sigui sin tin un direccion y maneho nacional.
E carga ta cay riba e profesionalnan
Pieters a expresa su reconocemento pa tur profesional, cu ta traha cu e personanan cu dependencia di alcohol, droga y otro tipo di adiccion. Segun Pieters, nan ta haci un trabou extraordinario, hopi biaha cu recurso y sosten limita. Pero precisamente pasobra nan ta haci tanto sacrificio, gobierno no por sigui laga nan lucha nan so. “Nos tin hendenan cu ta entrega nan alma pa yuda otro. Pero e pregunta ta: unda gobierno ta?”
Adiccion ta afecta henter sociedad
Segun Pieters, adiccion nunca ta un problema cu afecta solamente un individuo.
E ta afecta famia, e ta afecta mucha, e ta afecta bario, e ta afecta siguridad, e ta afecta salud publico. P’esey, segun PPA, solucion tampoco no por bin solamente for di un ministerio.
“Adiccion mester ta trata como un reto nacional.”
Prevencion ta e inversion di mas barata
Pieters a argumenta cu Aruba ta sigui gasta recurso tratando sintoma of consecuencia, mientras prevencion ta sigui ta subestima. Cada persona cu cay den dependencia ta representa un costo humano, social y financiero hopi mas halto cu cualkier inversion den prevencion. “E inversion di mas inteligente cu un pais por haci ta evita cu un ciudadano ta yega den e situacion eydi adicción.”
Gobierno mester stop cu discurso y cuminsa cu accion
Pa fraccion di PPA, ya no ta suficiente pa reconoce cu adiccion ta un problema. Gobierno mester presenta un plan nacional cu ta integra salud publico, salud mental, educacion, bienestar social, husticia y comunidad. Sin coordinacion, Aruba lo sigui move di crisis pa crisis.
Sin liderazgo, e profesionalnan lo sigui carga un peso cu no ta solamente di nan.
“Nos no por sigui pidi mas sacrificio di polis, medico, e fundacionnan y e boluntarionan, mientras politica ta keda atras.”
Pa Eduard Pieters, e pregunta principal no ta si Aruba tin e hendenan dispuesto pa yuda.
E pregunta ta, si gobierno finalmente lo asumi e liderazgo cu e situacion urgente aki ta exigi.