TCB ta informá
Tourism Corporation Bonaire (TCB) ta kontentu di por kolaborá un biaha mas ku e proyekto ‘Buki di Prèt’. Riba djárason 5 di ougùstùs 2026 muchanan entre 6 i 12 aña ta haña oportunidat pa bishitá Carnival Horizon i eksplorá e barku akí, siña mas tokante e industria krusero i gosa di un dushi lùnch na bordo. Meta di e proyekto akí ta pa laga e generashon mas yòn di Boneiru sera konosí ku e industria krusero i na mes momentu brinda nan un eksperensia inolvidabel i edukativo.
Inskripshon pa un chèns pa forma parti di e eksperensia akí ta tuma lugá riba djabièrnè 17 di yüli for di 10.00 or te 16.00 or.
Inskripshon ta posibel solamente online, entre 10.00 or i 16.00 or, pa medio di yena e formulario di inskripshon ku nos ta publiká riba e ‘account’-nan di Facebook i Instagram di TCB. Tuma nota ku no ta posibel pa inskribí promé òf despues di e periodo di inskripshon. No ta posibel tampoko pa inskribí na ofisina di TCB, ni via telefòn ni pa medio di email. Debí na maneho di e barku krusero, solamente un kantidat limitá di lugá ta disponibel.
Eksigensianan pa partisipashon
Pa motibu ku tin hopi interes pa e proyekto akí i e kantidat di inskripshon ku nos ta risibí ta mas tantu ku e kantidat di lugá disponibel, e aña akí nos ta introdusí un tiramentu di lòt pa garantisá un proseso hustu di selekshon. Nos ta inkluí tur inskripshon bálido ku keda entregá durante e periodo di inskripshon den e tiramentu di lòt. Pa bini na remarke, e partisipantenan:
Mester ta entre 6 i 12 aña di edat.
Den e añanan anterior no mester a partisipá na e proyekto akí, di manera ku otro partisipantenan tambe ta haña oportunidat pa gosa di e eksperensia akí. Si den añanan anterior ya kaba bo a partisipá na e proyekto akí, bo inskripshon no ta bini na remarke.
Por inskribí maksimalmente dos (2) mucha pa kada registrashon.
‘Upload’ un potrèt òf kopia klarito di pasport di kada mucha.
Inskripshon sin kopia di un pasport bálido no ta bini na remarke.
Sòru pa tur pregunta rekerí ta yená. Formulario di inskripshon ku no ta kompletamente yená no ta bini na remarke.
Firma e deklarashon di responsabilidat komo mayor òf tutor legal.
Tene kuenta ku pa medio di e inskripshon akí, outomátikamente bo ta duna pèrmit pa durante e evento akí, saka potrèt i graba video di bo yu(nan) pa metanan di merkadeo.
Entregá un inskripshon no ta un garantia pa partisipashon. Mesora despues di e tiramentu di lòt nos ta aserká e mayornan i tutornan di e muchanan ku a keda selektá, i nan ta risibí tur informashon práktiko tokante e bishita, inkluyendo e programa, e sitio di enkuentro, e orario i eventual eksigensianan adishonal.
“Nos ta sumamente kontentu ku nos por kontinuá nos kolaborashon ku Buki di Prèt den kuadro di e proyekto ‘Bonaire Cruise Adventure for Kids’. Ta un previlegio pa por brinda nos hóbennan lokal oportunidatnan asina inspirativo pa sera konosí ku e industria krusero”, segun Elesiër Angel, direktor di TCB.
TCB ta anhelá pa un biaha mas yama bon biní na un grupo di boneriano hóben na bordo di Carnival Horizon, pa loke sin ningun duda ta primintí di bira un dia dibertido, edukativo i inolvidabel riba laman.
