E reciente bishita di trabou di e Staatsecretaris di Hulanda na Aruba, tumando luga entre 14 y 16 di juli 2026, a keda marca pa un hermetismo administrativo cu ta lanta preguntanan serio tocante e transparencia di e maneho di Gobierno di Aruba y e relacion constitucional cu Hulanda. E serie di reunionnan teni, den cual e mandatario Hulandes a participa, a transcuri sin cu Parlamento di Aruba of e pueblo Arubiano tabata na altura di e obhecionnan, e contenido, ni e resultadonan di e encuentronan aki.
Ausencia di transparencia riba HOFA E punto di atencion principal ta e maneho rond di e Houdbare overheidsfinanciën Aruba (HOFA). Apesar di e importancia vital di e proceso aki pa e futuro financiero di e pais, no tin consenso ni claridad riba e siguiente pasonan. Ta nota cu ta tumando luga deliberacionnan cera entre e Staatsecretaris y e Gobierno di AVP-FUTURO, cu enfasis particular riba e rol di Minister di Finansas, Geoffrey Wever.
Criticanan ta apunta cu, mescos cu Minister Gerlien Croes, e mandatario Geoffrey Wever ta demostra un falta di rendicion di cuenta, locual ta wordo interpreta como un desprecio pa e deber constitucional di informa e organo legislativo. E preocupacion ta bira mas grandi ora cu e Staatsecretaris mes ta confirma cu tin dos regeling encamina: e Landsverordening LWHO pa ser pasa den Parlamento di Aruba y e Rijkswet pa ser trata na Hulanda. Sinembargo, Parlamento di Aruba ta falta informacion esencial pa por eherce su funcion di control. Parlamento di Aruba no ta informa cu absulatamente nada riba e intencionnan y cambionan di HOFA.
E impacto constitucional y e rol di Raad van State Segun declaracionnan atribui na e Staatsecretaris, e deliberacionnan ta base riba dos conseho di Hulanda, incluyendo esun di Raad van State. Den e proceso aki, e consehonan emiti localmente na Aruba a keda den segundo plano, si no netamente ignora. E perspectiva aki ta wordo denuncia como un forma di “neocolonialismo administrativo,” unda cu Hulanda ta impone su vision riba un pais cu, constitucionalmente, mester ta un partner autonomo.
E postura di Hulanda, den cual e consehonan Hulandes ta prevalece riba esnan di Aruba, ta sugera cu e autonomia financiero di e pais ta bou di presion constante. E Staatsecretaris a expresa cu e ta habri pa “haci algo miho,” pero e critica ta cu den practica, e decisionnan tuma ta limitando e capacidad di Aruba pa dirigi su mesun rumbo, forsando un retroceso den e autonomia cu mester a wordo proteha.
Responsabilidad di Parlamento E dinamica aki ta pone un luz riba e rol di e parlamentarionan di e coalicion AVP-FUTURO. Ta cuestiona si e legisladornan aki ta wordo manipula pa vota a fabor di medidanan cu ta bay contra e interesnan di nan mesun pueblo?. E percepcion publico ta cu e Gobierno actual ta hincando Aruba den un “FUTURO scur,” menasando e fundeshi di e pais di tal manera cu ta rebibando condicionnan cu ta corda riba añanan anterior na 1986.
E manera cu e Staatsecretaris a bandona Aruba dia 16 di juli, sin duna ningun declaracion oficial of contesta na e preguntanan di e pueblo y di Parlamento, ta wordo considera como un falta di respet institucional. E silencio aki, acompaña pa e falta di transparencia di e Gobierno di Aruba, ta laga e ciudadania den un estado di incertidumbre, cuestionando si e interesnan nacional di Aruba ta wordo sacrifica den e negociacionnan cera na Den Haag, mirando cu e consehonan di Aruba ta keda den bari y e propio gobienro di AVP –FUTURO ta permitiendo e paso nan aki.
