Minister di Salud Publico, Asunto Social, Cuido di Adulto Mayor y Maneho di Adiccion, drs. Melvin Wyatt-Ras, a ricibi recientemente Fundacion ABO (Aruba Bevolkingsonderzoek) pa e prome reunion formal na Bestuurskantoor.
E reunion tabata parti di e dialogo continuo tocante fortalecemento di cuido preventivo, screening nacional di cancer y deteccion mas tempran na Aruba. Durante e bishita, Fundacion ABO a presenta su cuenta anual di 2025 y a duna un actualisacion tocante su transicion for di e programa nacional di screening pa cancer di pecho, BOB, pa un organisacion mas amplio y mas structura, responsabel pa tres programa nacional pa screening di cancer: BOB pa cancer di pecho, BOCA pa cancer na boca di matriz y CORESA pa cancer di tripa.
Durante e combersacion, a trata e progreso di Fundacion ABO y su rol den e desaroyo di screening di cancer na Aruba. E fundacion tambe a confirma su registro oficial como proveedor di cuido di salud bou di e Landsverordening kwaliteit in de gezondheidszorg (LKIG) na februari 2026, como parti di su compromiso cu calidad den cuido preventivo.
Un punto importante di discusion tabata e importancia di intercambio efectivo y sigur di dato. Acceso na informacion di siguimento relaciona cu diagnosis y resultado por yuda Fundacion ABO monitor e efectividad di su programanan di screening miho, midi deteccion tempran y guia mehoracion pa futuro basa riba dato confiabel y valido.
E Minister y Fundacion ABO tambe a trata e cooperacion continuo cu partnernan importante den sector di salud, incluyendo DVG, HOH, LabHOH, HAVA y AZV. Cooperacion entre e diferente actornan ta esencial pa fortalece henter e trayecto di screening, for di invitacion y participacion te na siguimento y diagnosis trempan.
E Ministerio ta aprecia e intercambio constructivo aki y ta considera cooperacion entre Fundacion ABO, e Ministerio y otro partnernan den sector di salud esencial pa sigui fortalece screening y deteccion trempan di cancer na Aruba, cu atencion pa calidad, accesibilidad y un trayecto di cuido sigur.
