Mientras cu e pais ta pasando den un situacion financiero tenso y pueblo ta keda constantemente preocupa pa e gastonan di gobierno, e minister di Enseñansa, Deporte, Hóbentud, Inovashon Gerlien Croes, a dicidi di habri caha di paña pa un amiga politico cercano. Den un ministeriele beschikking di 21 di juli 2026, gobierno a formalisa un contracto di oro pa e psicologo y ex-parlamentario Misha Raymond,y politico activo actualmente, un acto cu ta grita malgastamento di placa publico.
Un sueldo astronomico riba costia di pueblo
E contracto cu a wordo otorga directamente sin ningun sorto di (onderhandse aanbesteding) na POPA Psychologie- en Onderwijspraktijk Aruba, representa pa su director y amiga politico Misha Raymond, ta costa e pueblo di Aruba e suma escandaloso di Afl. 13.423 pa luna (inclusivo BBO, B-AZV y B-AVP). Si esei no tabata suficiente, cualkier ora extra cu e traha lo wordo recompensa cu un tarifa exorbitante di Afl. 155 pa ora.
Cu ken ta paga tur e placa aki? Ta pueblo mes, cu ta sigui paga impuesto halto mientras cu amiganan politico di minister ta yena saco den oficina di gobierno bou di e pretexto di “apoyo estratégico”.
E hipocresia politico di Minister Gerlien Croes
Loco ta pa mira cu e mesun Minister Gerlien Croes ta esun cu den pasado tabata critica duro cualkier forma di malgastamento di placa, papiando grandi tocante integridad y gastonan di gobernacion. Ma awor cu e ta sinta riba e stoel di poder, e ta haci exactamente e mesun cos, of peor: e ta bypass e ley di anbesteding (usando articulo 16 di e Aanbestedingsverordening) pa asina entrega un posicion cushina den cushina sin duna ningun otro profesional un chens. Ta con ta posibel cu un mandatario ta probecha di un “confiansa mutuo” pa duna un contracto di miles di florin pa luna na un ex-colega politico manera Misha Raymond, mientras cu ciudadanonan comun ta luchando pafo pa sobrevivi?
Tin Pais Aruba berdad na pecho?
E pregunta cu henter comunidad mester haci su mes awe ta: berdad Minister Gerlien Croes tin Pais Aruba na pecho?
Ora bo mira con ta duna placa di belasting na amiganan politico pa trabou cu hopi biaha por a wordo haci pa empleadonan publico existente, e contesta ta mas cu claro. Esaki no ta gobernacion di pueblo y pa pueblo; esaki ta amiguismu politico na su maximo expresion. Pueblo merece clarificacion y un contesta directo di e minister: pakico mester a crea un funcion di luho asina p’e ex-lider di fraccion di RAIZ, mientras cu e gastonan di gobierno ta supuesto di ta bou di control?
